“Shkoni edhe prapa Diellit”/ Berisha paralajmëron Ramën dhe Ahmetajn: Nuk do të shpëtoni

25 Korrik 2022, 13:10, Politikë CNA

“Shkoni edhe prapa Diellit”/ Berisha paralajmëron Ramën

Ish-kryeministri dhe kreu i PD-së, Sali Berisha, ka folur me tone të forta sot në lidhje me aferën e inceneratorëve.

Në një deklaratë për mediat, Berisha tha se Arben Ahmetaj është strumbullar i kësaj, që ai e cilëson si megavjedhje.

Por sipas tij, “koka” është vetë kryeministri Edi Rama.

Po ashtu ai paralajmëroi se Rama dhe Ahmetaj nuk do të mund të shpëtojnë, edhe sikur të shkojnë “prapa Diellit”.

“Pse Arben Ahmetaj është strumbullari? Ekipi i kësaj megavjedhje ka pasur tre ushtarë: Zoton, Gugalen dhe Mërtirin.

Arben Ahmetaj, i pyetur në komisionin parlamentar, paraqiti traumën e tij, por nuk pohoi njohjen me Mërtirin.

Unë u them shqiptarëve se ai ka qenë menaxher i kompanisë Hermes, me të cilën Arben Ahmetaj ka vjedhur miliarda impulse, që kapin vlerën e 13 milionë eurove.

Arben Ahmetaj pësoi një aksident kur ishte i shoqëruar në Maqedoni me këta mafiozë.

Arben Ahmetaj është njeriu që ka firmosur shndërrimin e fondit të emergjencës në fondin për djegësit, jo pak, por 55 milionë euro.

Ai vërtet nuk ka firmosur në kontratën e djegësit të Tiranës, por ka firmosur në kontratën e projektit të djegësit të Tiranës.

Ai u shkarkua vetëm me një qëllim: të shpëtojë lëkurën e Edi Ramës.

Arben Ahmetaj, në vitin 2005, është arratisur disa vite në Rumani, ku kërkonte azil.

Tani ai e liron nga detyra vetëm e vetëm që ai të largohet. Me këtë rast, unë i them Edi Ramës, se edhe në ata satelitët që ke porositur, të shkojë, do të bëhet përgjegjës para shqiptarëve për këtë aferë dhe aferat e tij.

Rama është kryeministri më hajdut i 110 viteve të fundit në Shqipëri, kryeministri më hajdut i rajonit dhe Europës.

Mund t’i bësh presion dhe t’ia mbyllësh gojën SPAK-ut të partisë, por shqiptarët dhe popullin opozitar, nuk do mundesh kurrë ta trysnosh pa të dhënë vendin që meriton si një hajdut i papërmbajtur.

E njëjta gjë vlen për Arben Ahmetajn, shko edhe prapa diellit. Por nuk do të kesh shpëtim më. Kjo aferë për popullin opozitar është për jetë a vdekje.”-tha Berisha./CNA.al