E fundit!

08:09 Kronika

E rëndë në Maliq/ Një person vret efektivin e policisë, plagos 1 tjetër

Një ngjarje e rëndë është shënuar këtë të enjte në Maliq, ...

“Rama përmend vetëm drogën”/ Berisha: Do të subvencionojmë sektorin e bimëve mjekësore

17 Prill 2025, 11:47, Politikë CNA

“Rama përmend vetëm drogën”/ Berisha: Do të

Kreu i Partisë Demokratike, Sali Berisha, zhvilloi sot një bashkëbisedim me prodhuesit e bimëve mjekësore. Në fjalën e tij, Berisha theksoi rëndësinë e këtij sektori për shoqërinë, por edhe për eksportin.

Berisha u shpreh se Shqipëria ka një pasuri shumë të madhe te bimët mjekësore e aromatike, por nuk ka pasur mbështetjen e duhur nga shteti.

Berisha tha se me projektin për Shqipërinë Madhështore e konsiderojmë sektorin e bujqësisë një sektor të rëndësisë parësore për realizimin e këtij projekti.

Berisha shtoi se për këtë sektor të veçantë PD-ja do ta subvencionojë çdo përpjekje për kultivimin, për mbledhjen, për grumbullimin, për përpunimin dhe eksportin e bimëve mjekësore.

Kryedemokrati akuzoi kryeministrin Rama se që kur ka ardhur në pushtet, nuk ka folur asnjëherë për bimët mjekësore dhe aromatike.

“Shqipëria është ndoshta për sipërfaqe, kilometër katrorë, vendi më i pasur që mund të ekzistojë në bimësinë e saj, në biodiversitetin e saj.

Shqipëria ka një pasuri shumë të madhe te bimët eterovajore, bimët mjekësore, aromatike, që kanë një treg të pashtershëm, të garantuar dhe që nuk ka pasur mbështetjen e duhur nga shteti.

Është injoruar në një mënyrë ose në një tjetër.

Përveç kësaj, këtij sektori, që është sektor eksporti, këto vitet e fundit i ka ndodhur edhe një goditje shumë e rëndë nga narkoeuro.

Sepse ju jeni sektor eksporti dhe natyrisht transaksionet janë në dollarë dhe euro.

Krijimi i narkoeuros, zhvlerësimi i saj nga euro e bimëve helmuese, drogave, ka bërë që me qindra e qindra sipërmarrje eksporti të falimentojnë dhe me dhjetëra mijëra shqiptarë të humbasin vendet e punës.

Ne në projektin tonë për Shqipërinë Madhështore, e konsiderojmë sektorin e bujqësisë një sektor të rëndësisë parësore për realizimin e këtij projekti.

Dhe jemi zotuar për një përmbysje të plotë të sistemit aktual, të qëndrimit të këtij sistemi ndaj bujqësisë, blegtorisë, bimëve aromatike, etj.

Ne do të dyfishojmë buxhetin për këtë sektor dhe do të katër ose pesëfishojmë subvencionin për fermerët.

Do të subvencionojmë çdo hektar të mbjellë, çdo kokë bagëti dhe çdo fidan të mbjellë.

Për ju si sektor i veçantë do të subvencionojmë çdo përpjekje tuajën për kultivimin, për mbledhjen, për grumbullimin, për përpunimin dhe eksportin.

Ju garantoj se do të jeni një sektor me përparësi absolute.

Kjo përputhet 100 për qind me filozofinë tonë 'Made in Albania', prodhimi shqiptar.

Sepse ne këtë 'Made in Albania' e konsiderojmë levën e Arkimedit për të rritur rrogat, për të rritur pensionet, për të begatuar familjet, për të rritur prodhimin, për të konsoliduar ekonominë si ekonomi prodhuese.

Ne shpallim prodhimin si udhëheqës të ekonomisë sonë.

Sepse Shqipëria ka mundësi të jashtëzakonshme prodhimi dhe prodhimi po bie prej disa vitesh.

Janë krijuar mangësi të mëdha në krah pune. Ikni u thoshte ky narkodiktatori, që siç keni dëgjuar ju, nuk e ka shqipëruar njëherë fjalën sherebelë, por ka shqipëruar qindra mijëra herë fjalën kanabis. I ka mbetur shpirti në drogë të ziut, paçka se droga është shkatërrim, është rrënim, droga merr jetë, droga shkatërron shëndet, shkatërron familje, shkatërron komb.

Dhe ky, që kur ka ardhur në pushtet, nuk ka folur njëherë për ullinjtë, për vreshtin, për mollët, për arrat, për gështenjat, për bimët mjekësore, për bimët aromatike.

Bima e vetme aromatike për narkodiktatorin është droga”,-tha Berisha./CNA