"Rama, dhjetëra njolla turpi"/ Peka, thirrje për pjesëmarrje në protestën e 11 korrikut

8 Korrik 2024, 11:11, Politikë CNA

"Rama, dhjetëra njolla turpi"/ Peka, thirrje për

Avenir Peka

Drejtuesi i Departamentit të Sigurisë në PD, Avenir Peka, u ka bërë thirrje të gjithë shqiptarëve që të marrin pjesë në protestën që do të zhvillohet më 11 korrik, ora 20:00, para Kryeministrisë.

Në një deklaratë nga selia blu ai theksoi se rendi dhe siguria është në dorën e bandave. Sipas tij Rama dhe ministrat kanë dhjetëra njolla turpi dhe skandale.

Deklarata e plotë:

Me 11 korrik, opozitarët, demokratë, socialistë të ndershëm dhe ata pa parti, do të bëhen bashkë në betejën për kthimin e sigurisë dhe normalitetit në Shqipëri.

Edi Rama dhe Rilindja e kanë kthyer vendin në një gropë skeptike të krimit, korrupsionit dhe emigracionit.

Kur mijëra shqiptarë, prindër dhe fëmijë, bëjnë gati valixhet për të kërkuar një jetë të sigurt dhe pa nëpërkëmbje, paratë e krimit dhe korrupsionit janë sheshit në të gjitha sheshet kryesore të Tiranës. Paratë e narkoshtetit formalizohen si ‘investime strategjike’ në resortet e bregdetit duke i futur kthetrat deri edhe në parqet arkeologjike. Policia e shtetit dhe institucionet e zbatimit të ligjit kanë vendosur të jenë në krahun e së keqes, truproja të narkotrafikantëve, dhe jo mbrojtës të qytetarëve.

Sa i takon rendit dhe sigurisë, Rama dhe ministrat e tij kanë dhjetëra njolla turpi dhe skandale, por po përmendim më kryesoret:

1. Prej 11 vitesh bandat kriminale ushtrojnë kontroll të plotë politik mbi Ministrinë e Brendshme dhe Policinë e Shtetit nëpërmjet Saimir Tahirit, Fatmir Xhafës dhe Taulant Ballës. Nëpërmjet tyre, bandat kane emëruar përfaqësuesit e tyre në nivelet më të larta të Policisë se shtetit, jo vetëm në nivel vendor, por dhe qendror. Oltion Bistri, ish-shefi i Njësisë Operacionale është i arrestuar për shkak të përgjimeve të ardhura nga Belgjika. Në ato përgjime nuk është vetëm ai, por me dhjetëra drejtues aktualë të Policisë së Shtetit, të cilët mbrohen prej fijeve politike që kontrollojnë SPAK-un.

2. Drejtues të lartë të policisë vodhën dhe manipuluan sistemin TIMS, të dhuruar nga qeveria e Shteteve të Bashkuara për të zhdukur gjurmët e trafikut të drogës të vëllait të kryeministrit, dhe për llogari të eksponentëve të tjerë te krimit.

3. Operacioni i bujshëm Forca e Ligjit nuk u krye për të gjurmuar paratë me burim të paligjshëm, por që a) të ndihmonte bandat kriminale të qeverisë për të pastruar pasuritë me prejardhje kriminale, b) për presion mbi bandat për zgjedhjet vendore të vitit 2023, si dhe c) për t'u vënë gjoba atyre që nuk bindeshin.

4. Rekrutimet si dhe sistemi i gradave në Policinë e Shtetit e kanë kthyer atë në një strukturë tërësisht politike duke krijuar breza të rinj patronazhistësh, dhe kontingjent për krimin.

5. Shërbimi Informativ i Shtetit është institucioni i fundit i pavarur që është vënë tërësisht nën tutelën politike dhe kontrollin e bandave.

Për të gjitha këto, për t’i thënë ndal inkriminimit të shtetit, shpopullimit të vendit që vjen nga pasiguria dhe përkeqësimit ekonomik që vjen nga sundimi i narkotrafikut, le të bashkohemi në betejën për ta kthyer Shqipërinë në normalitet.

Të enjten në orën 20.00, le të bëhemi bashkë me një mesazh: t’ua heqim shtetin bandave dhe t’ua kthejmë qytetarëve!/CNA