"Po hartojmë strategjinë e Marinave Inteligjente"/ Balluku: Kjo industri ka nevojë për vajza dhe djem të trajnuar

22 Shtator 2025, 15:46, Politikë CNA

"Po hartojmë strategjinë e Marinave Inteligjente"/ Balluku:

Zëvendëskryeministrja, njëherësh ministrja e Infrastrukturës dhe Energjetikës, Belinda Balluku, mori pjesë në Konferencën V Ndërkombëtare për Marinat e Qëndrueshme dhe ato Inteligjente që u mbajt në Monako.

Balluku, në një deklaratë për mediat, tha se Shqipëria do të jetë në një hap me vendet e tjera fqinje dhe të rajonit për sa i përket industrisë detare dhe asaj të marinave.

Ministrja tha se prej tre muajsh në bashkëpunim me skuadrën e studios “Luca Dini” dhe me arkitektin e mirënjohur po harton strategjinë e Marinave të Qëndrushme, e cila kërkon vajza dhe djem të rinj.

"Sot u zhvillua në Monako Konferenca V Ndërkombëtare për Marinat e Qëndrueshme dhe ato Inteligjente. Shqipëria po merr pjesë për herë të parë pasi për herë të parë ne kemi nisur dizajnimin e një strategjie për zhvillimin e marinave nga veriu në jug për ta kthyer Shqipërinë në një hap në zemër të Mesdheut ashtu siç kanë bërë edhe fqinjët tanë Kroacia, Mali i Zi apo Greqia.

Vitet e fundit industria detare ka njohur një zhvillim të qenësishëm. Plani për ndërtimin e një porti të ri komercial në zonën e Porto Romanos, apo ndërtimi i një porti të ri në Triport i ka dhënë një hov të ri industrisë së marinave, pasi marina e Durrësit dhe ajo e Vlorës shumë shpejt do të nisin operacionet e tyre.

Por nga ana tjetër kjo industri e re, pjesë e industrisë detare po zhvillohet me hapa të qenësishëm dhe inovatorë në të gjithë Europën.

Shqipëria duhet të jetë në të njëjtin hap edhe me vendet e tjera europiane dhe dita e sotme në Monako ka shërbyer për të krijuar lidhje shumë të mira nga qeveritë e ndryshme që merrnin pjesë siç ishte rasti i ministres së Punëve Publike dhe Industrisë Detare të Monakos apo edhe kolegë të tjerë.

Pata rastin të diskutoj me shumë investorë të huaj nga e gjithë bota, të cilët janë shumë të interesuar për industrinë detare në Shqipëri.

Gjatë ditës së sotme isha e shoqëruar së bashku me skuadrën e Luca Dinit dhe me arkitektin e njohur italian, i cili tashmë prej tre muajsh po punon së bashku me Ministrinë e Infrastrukturës për të hartuar Strategjinë Detare, Strategjinë e Marinave Inteligjente dhe të Qëndrueshme.

E gjithë kjo punë do ta kthejë Shqipërinë në një hap mesdhetar të një industrie si pjesë e turizmit, që tashmë është kthyer në një nga sektorët më të rëndësishëm të ekonomisë sonë, por që duhet të ketë sa më shumë inovacion për të krijuar një qëndrueshmëri edhe për dekadat e ardhshme.

Sot ishte një ditë e shkëlqyer për të promovuar të gjithë ecurinë e infrastrukturës shqiptare, asaj të aviacionit, rrugore dhe detare.

Lajmi i mirë është se kjo infrastrukturë e re, ky sektor që do të zhvillohet do të ketë nevojë për djem dhe vajza të reja, të cilët duhen trajnuar dhe duhen shkolluar mbi këto inovacione të industrisë detare", tha Balluku./CNA