Olsi Komici në krye të AKU/ Muçollari: Rama e përdor për shërbëtorët e punëve të pisëta në drejtësi

1 Shkurt 2025, 13:45, Politikë CNA

Olsi Komici në krye të AKU/ Muçollari: Rama e përdor

Grigels Muçollari

Partia Demokratike ka akuzuar sot Qeverinë dhe Edi Ramën se, kanë dështuar në fushën e sigurisë ushqimore.

Në një deklaratë nga anëtari i kryesisë së PD, Grigels Muçollari shprehu shqetësimin se Autoritetit Kombëtar të Ushqimit nuk mban përgjegjësi për dështimin sistematik të pasigurisë ushqimore që ekziston sot në Shqipëri.

Muçollari shtoi se qytetarët presin siguri ushqimore, e teksa agjensia qeveritare ka dështuar, Edi Rama e përdor karrigen e AKU për të shpërblyer shërbetorët e punëve të pisëta në drejtësi.

Deklarata e anëtarit të kryesisë së PD, Grigels Muçollari:

“Prej dy ditësh, mediat kryesore në vend bëjnë me dije se është larguar drejtori i Autoritetit Kombëtar të Ushqimit, dhe në krye ka ardhur, Olsi Komici, i cili deri më tani ka kryer detyrën e komisionerit në Komisionin e Pavarur të Kualifikimit, pra në një nga organet e reja të drejtësisë që u mor me procesin e vetingut, të heqjes së prokurorëve dhe gjyqtarëve.

Kuptohet se qeveria nuk e sheh të arsyeshme të bëjë transparencë për këtë lëvizje.

Nuk ka dyshim se kreu i AKU duhej të mbante përgjegjësi dhe duhej të largohej nga ajo detyrë, për shkak të dështimit sistematik dhe për shkak të pasigurisë ushqimore që ekziston sot në Shqipëri.

Problemi është se qeveria dhe Kryeministri e shohin këtë zyrë, jo si një përgjegjësi të madhe publike, por si një post për të kënaqur interesat e për të shpërblyer fluksin e tyre.

Ky emërim, i një komisioneri të rëndësishëm të vetingut në agjenci qeveritare, dëshmon po ashtu mungesën e pavarësisë së këtij procesi në drejtësi.

Autoriteti Kombëtar i Ushqimit është një institucion që ka detyrim shumë të fortë ndaj publikut dhe qytetarëve që ka të bëjë me cilësinë dhe garancinë e asaj që njerëzit konsumojnë.

Edi Rama që për vete konsumon verë 33 mijë euro shishja, frekuenton qendrat më të shtrenjta të detoksifikimit në Europë, sigurisht nuk e ka problem se çfarë hanë e çfarë pinë qytetarët.

Atij i intereson më shumë të shpërblejë me një post, dikë që i ka shërbyer.

Për Partinë Demokratike, siguria ushqimore është e barabartë me sigurinë kombëtare.

Ne kemi një angazhim për ta garantuar cilësinë dhe sigurinë e ushqimeve, për të garantuar shëndetin e qytetarëve.

Me ekspertët më të mirë të fushës, me investimin e duhur për të përmirësuar sistemin.

Pasiguria ushqimore do të ndalet me 11 maj, me ndryshimin që do të sjellë vota e shqiptarëve”, - tha Muçollari./ CNA