web counter
LEXO PA REKLAMA!

SHKARKO APP

App Store
Google Play

E fundit!

x

Nisma për ndryshime në rregulloren e Kuvendit/ Balla: Duhet të përshtatemi me procesin e integrimit në BE

5 Mars 2026, 12:12, Politikë CNA

Nisma për ndryshime në rregulloren e Kuvendit/ Balla: Duhet të

Kryetari i Grupit Parlamentar të Partisë Socialiste, Taulant Balla, në një replikë gjatë seancës plenare në Kuvend, u shpreh se nismat për ndryshime në rregulloren e Kuvendit janë të bazuara plotësisht në të drejtën që çdo deputet ka sipas rregullores për të propozuar ndryshime.

Balla theksoi se këto propozime janë pjesë e një procesi normal parlamentar dhe do të diskutohen e përmirësohen gjatë javëve në vijim, sipas procedurave të parashikuara nga Kushtetuta dhe rregullorja e Kuvendit.

Ai theksoi gjithashtu rëndësinë e përshtatjes së punës parlamentare me fazën në të cilën ndodhet Shqipëria në procesin e anëtarësimit në Bashkimin Europian, duke theksuar se deri më tani Kuvendi ka miratuar mbi 27 ligje që lidhen me përafrimin me legjislacionin europian, pa përdorur procedura të përshpejtuara.

Sipas Ballës, në të ardhmen do të duhet një diskutim më i gjerë për procedura të thjeshtuara dhe mekanizma që lehtësojnë reflektimin e ndryshimeve ligjore gjatë procesit të integrimit.

“Në replikë të citimeve dhe përmendjes së një nisme, e cila është tërësisht e bazuar në rregulloren e Kuvendit, në të drejtën siç e përcakton rregullorja, që çdo deputet mund të propozojë ndryshime në rregullore. Pra, unë nuk i marr leje askujt nga krahu i majtë i kësaj salle, por natyrisht është një proces i cili është njoftuar nga ana jonë në komunikime publike, që do të ndërmarrim disa nisma. Është me tepër rëndësi, mendoj unë, që të sqarohet, por në kohën e duhur se nismat janë propozime, të cilat duhen përmirësuar, do të përmirësohen në një proces, i cili do të marrë javët e veta të përcaktuara nga rregullorja dhe nga Kushtetuta. Është shumë e nevojshme që në këtë fazë që gjendet Shqipëria dhe roli udhëheqës që ka Kuvendi i Shqipërisë përgjatë procesit të anëtarësimit në Bashkimin Europian, të kuptojmë që ne duhet të përshtasim edhe punën tonë parlamentare, jo me procedura të përshpejtuara. Nuk e kemi përdorur procedurën e përshpejtuar në asnjërin prej ligjeve që kanë synuar përafrim deri më tani. Mos harroni, janë mbi 27 ligje që kanë kaluar në Kuvendin e Shqipërisë në këtë legjislaturë, të cilat në asnjë rast nuk i kemi përdorur për procedurën e përshpejtuar. Por do të kemi kohë të flasim, sepse për të gjithë ata që kanë pak njohuri në këtë proces, sikurse ka kaluar ky proces në Kroaci, në Rumani, në Bullgari, do të duhet të ulemi me njëri-tjetrin për të folur për procedurat e thjeshtuara (simplified procedures), duhet të ulemi të flasim me njëri-tjetrin për 'omniprocedures', në kuptimin që na duhen që të gjejmë procedura të cilat me një ndryshim të reflektohen ndryshimet. Do të kemi kohë të diskutojmë për këtë, nuk është çështje e rendit të ditës”, u shpreh Balla. /CNA





Lajmet e fundit nga