“Nder dhe përgjegjësi e jashtëzakonshme”/ Enri Ceno flet pas marrjes së postit të rëndësishëm në PD

18 Korrik 2022, 14:36, Politikë CNA

“Nder dhe përgjegjësi e jashtëzakonshme”/ Enri Ceno

Sali Berisha dhe Enri Ceno

Enri Ceno është prezantuar sot nga lideri demokrat Sali Berisha në një dalje për mediat si sekretar për Marrëdhëniet Ndërkombëtare në PD-së.

Duke vlerësuar maksimalisht figurën e tij, Berisha u shpreh me bindje se Ceno da ta kryejë me përgjegjësi këtë detyrë të rëndësishme.

Pas kësaj ka reaguar edhe vetë Ceno. Duke e konsideruar si nder dhe një përgjegjësi të jashtëzakonshme, ai ka shpjeguar në mënyrë të detajuar rolin dhe synimet e Sekretariatit.

“Për mua është një nder dhe përgjegjësi e jashtëzakonshme, që si Sekretar i Marrëdhënieve me Jashtë të mbështes liderin dhe lidershipin e Partisë Demokratike në vazhdimin dhe forcimin e marrëdhënieve me aleatët perëndimorë.

Vizioni i Sekretariatit është sigurimi i mbështetjes së plotë ndërkombëtare për Partinë Demokratike si aktori kyç për stabilitetin e Shqipërisë.

Në punën tonë si Sekretariat, ne do të mbështetemi në përvojën e figurave të larta të Partisë Demokratike me përvojë shumëvjeçare në fushën e marrëdhënieve ndërkombëtare me kontakte jetike me partnerë strategjikë.

Sekretariati gjithashtu do të mbështetet nga një ekip teknik, me profesionistë cilësorë dhe besnikë ndaj misionit dhe vlerave të PD.

Sekretariati si hap të parë të punës së tij do të ketë ngritjen e një Këshilli për Marrëdhëniet me Jashtë dhe të Bordit Këshillimor Ndërkombëtar të Nivelit të Lartë .

Bordi Ndërkombëtar do të jetë një organ i pavarur i personaliteteve të nivelit të lartë ndërkombëtar në politikë, diplomaci, sigurinë dhe biznes.

Personalitetet prestigjioze të Bordit do ti ofrojnë mundësinë për formësimin e marrëdhënieve ndërkombëtare të PDSH-së dhe avokimit të saj të jashtëm, dhe organizimit të aktiviteteve të saj në botë.

Përveç ekspertizës dhe kontakteve të jashtme, Bordi Ndërkombëtar do të mbajë një samit vjetor të nivelit të lartë në Shqipëri, i cili do të sjellë së bashku anëtarë të bordit, të ftuar të profilit të lartë, miq ndërkombëtarë të PD-së dhe investitorë të huaj.

Krijimi dhe fillimi i punës së këtij Sekretariati synon të shënojë një pikë kthese në marrëdhëniet e PD me partnerët e jashtëm, në mënyrë që Partia Demokratike të fillojë në mënyrë të strukturuar dhe proaktive përpjekjet për të rivendosur lidhjet e saj me botën perëndimore, jo vetëm në dimensionin politik por edhe në fushën e investimeve strategjike.

Sekretariati do të mbështesë lidershipin e PD në punën për lidhje më të forta të partisë me komunitetin ndërkombëtar si dhe në transformimin e PD në një forcë realisht konservatore dhe përfaqësuese me lidhje dhe kontakte të forta në rajon dhe në botë", shkruan Ceno./E.T-CNA.al