web counter
LEXO PA REKLAMA!

SHKARKO APP

App Store
Google Play

Mungesa e një shkolle dhe gjimnazi në Astir e Yzberisht/ Muçollari: Kjo padrejtësi merr fund më 11 maj

7 Prill 2025, 13:09, Politikë CNA

Mungesa e një shkolle dhe gjimnazi në Astir e Yzberisht/

Kandidati për deputet i PD-së, Grigels Muçollari, ka ndarë sot një denoncim mbi një problematikë në zonën e Astirit dhe Yzberishtit. Muçollari theksoi mungesën e një shkollë 9-vjeçare dhe një gjimnazi në këtë zonë.

Muçollari shprehet se megjthëse pronari i tokës ia ka dhuruar këtë pronë bashkisë, me një kontratë që ky truall mund të përdoret vetëm për shkollë, trualli është bosh prej gjashtë vitesh.

Muçollari tha se më 11 maj, kjo padrejtësi për banorët e kësaj zone do të marrë fund.

“Ndodhem sot në njësinë nr. 14, në zonën e Astirit dhe Yzberishtit, aty ku jetojnë afro 70 mijë banorë.

Një komunitet i madh, që prej vitesh ka nevojë jetike për një shkollë 9-vjeçare dhe për një gjimnaz, por NUK i ka. Nuk i ka, jo se mungon nevoja, por sepse qeveria dhe bashkia nuk i konsiderojnë banorët këtu, nuk i shohin, nuk i dëgjojnë dhe nuk i përfillin.

Sipas dokumenteve që do publikoj tregohet qartë se pronari i kësaj toke pas meje, bashkë me zhvilluesin, në vitin 2019 ia dhuruan Bashkisë së Tiranës plot 10 mijë metra katrorë për ndërtimin e një shkolle 9-vjeçare dhe një gjimnazi.

Mosbesimi te bashkia dhe qeveria ndihet edhe në kontratë, ku dhuruesit kanë bërë një dhuratë me kusht, e zeza mbi të bardhë: ky truall mund të përdoret vetëm për shkollë. Sepse e dinin mirë me kë kishin të bënin që po të mos ishte ky kusht, ndoshta sot këtu do ishin ngritur themelet e ndonjë kulle tjetër për klientët e zakonshëm.

Ja ku i keni: dokumentet e dhurimit, kontrata noteriale. Të gjitha të rregullta, të firmosura.

Po çfarë ka bërë bashkia në këto 6 vite?

Asgjë. Zero. Ja ku është trualli, bosh. Prej gjashtë vitesh, i lënë pas dore. Asnjë projekt, asnjë punë, asnjë interes. Gjashtë vite! Kur për të ndërtuar një kullë për klientët e tyre, nuk u duhen më shumë se 6 muaj, por për shkolla nuk gjejnë as kohën, as vullnetin. Sepse për ta, më shumë vlen një marrëveshje me oligarkët si në rastin e stadiumit 'Selman Stërmasi' sesa nevoja jetike e këtij komuniteti.

Më 11 maj, kjo padrejtësi do të marrë fund. Më 11 maj, qytetarët e kësaj zone do të zgjedhin me votë që këtu të ngrihen dy shkolla të domosdoshme për komunitetin.

Partia Demokratike, sapo të marrë drejtimin e vendit, do të nisë menjëherë ndërtimin e tyre. Pikërisht këtu, në këtë truall të dhuruar me përgjegjësi dhe vizion qytetar, do të ngrihet me urgjencë një shkollë 9-vjeçare dhe një gjimnaz.

Fëmijët e kësaj zone kanë të drejtën për të mësuar në kushte dinjitoze. Dhe kjo e drejtë do të bëhet realitet. Me votën e qytetarëve”,-tha Muçollari./CNA





Lajmet e fundit nga