Monika Kryemadhi zbulon grupin "armiqësor" në KQZ

4 Maj 2023, 13:59, Politikë CNA

Monika Kryemadhi zbulon grupin "armiqësor" në KQZ

Deputetja Monika Kryemadhi

Deputetja Monika Kryemadhi në një dalje në televizionin "News24" zbuloi komplotin e organizuar nga KQZ-ja lidhur me fletën e votimit.

Kryemadhi, midis të tjerash, deklaroi se fleta e votimit për zgjedhjet e 14 majit është bërë qëllimisht më e madhe se formati që nevojitet.

Kryemadhi shpjegoi motivet se pse formati i fletës së votimit është zgjedhur dhe miratuar që të jetë A3.

Sipas Kryemadhit, me këtë format fleta bëhet tepër e madhe dhe kjo nuk ka kuptim sa kohë që mbetet plot vend bosh brenda fletës.

Hipoteza e Kryemadhit është që kjo duhet të jetë bërë qëllimisht. Ky format flete A3 bën të mundur që komisionerët të lexojnë se cilës parti ia jep votën qytetari.

“Pse është kaq e madhe fleta e votimit, ti s’ke pse e bën kaq të madhe. Ky është format A3, prandaj e kanë bërë fletën kaq të madhe që komisioneri të lexojë se ku vendos votën në fletën e votimit.

Janë teknikalitete, por duhen parë se ku vendoset kutia e fshehtë dhe ku qëndrojnë vëzhguesit”, u shpreh Kryemadhi.

Nëse zhvillojmë dhe zbërthejmë konspiracionin "Kryemadhi" nuk e kuptojmë se pse ai format e bën të pamundur që Komisionerët e Monikës të mund të lexojnë se ku e vendosin votën votuesit. Pse ky "lexim" u bëka i mundur vetëm për "the others" dhe jo edhe për ata "tanët", por Monika duhet marrë, sidoqoftë, seriozisht.

Ajo që Kryemadhi na kumtoi, më shumë sesa frikë se mos u lexoka bota, duket si deklarim i zbulimit të një grupi "armiqësor" në KQZ kundër aleancës së Ilir Metës.

Kujtojmë se formati i fletës së votimit bëhet nga Komisioni Rregullator i KQZ-së.

Në Komisionin Rregullator, Kryemadhi ka të emëruar anëtarin përfaqësues të ish-LSI-së, (sot Partia e Lirisë).

Në Komisionin Rregullator, Berisha ka si përfaqësuese zonjën Helga Vukaj, ish-nëndrejtoreshë e Agjencisë së Kthimit dhe Kompensimit të Pronave në të dyja qeveritë Berisha dhe Ministre e Financave në tranzicionin e zgjedhjeve të vitit 2017.

Formati i fletës së votimit miratohet me shumicë të cilësuar votash.

PS në Komisionin Rregullator ka 3 anëtarë.

Vota vendimmarrëse për formatin e fletës së votimit i takon zonjës Vukaj dhe përfaqësuesit të LSI-së.

Me sa duket në KQZ janë shtuar konspiracionistët kundër Monikës, aq sa Monika e shikon qartë në horizont humbjen!

Monika është njohëse e thellë e Kodit Zgjedhor, ndaj nuk e besojmë dot që thjesht ka lajthitur dhe nuk di më se ç'flet!/ CNA.al