“Mbështetje dhe grante për të rinjtë”/ Berisha: Prova e PD-së është të nisë ndryshimin nga rinia

27 Prill 2025, 20:17, Politikë CNA

“Mbështetje dhe grante për të rinjtë”/ Berisha:

Kreu i Partisë Demokratike, Sali Berisha zhvilloi këtë mbrëmje një takim në Kuçovë. Në fjalën e tij, Berisha theksoi se prova e vizionit të PD-së është të kthejë kombin në moshën e rinisë së tij.

Berisha tha se programi i PD-së synon që Qeveria të përcaktojë grante për çdo biznes dhe startup të të rinjve.

Berisha u shpreh se objektiv kryesor për PD-në do të jetë shkollimi në një arsim modern, në shkolla të pajisura me teknologji më të mira e me cilësinë më të lartë.

“Më të vendosur se kurrë për të votuar me 11 maj, ndryshimin dhe ndarjen nga një e keqe që po i rrëmben kombit të ardhmen dhe rininë e tij.

Po ne garantojmë të rejat dhe të rinjtë, fëmijët se shkollimi i tyre në një arsim modern, në shkolla të pajisura me teknologji më të mira, me cilësi më të lartë do të jetë objektiv kryesor, duke dyfishuar buxhetin për arsimin dhe se nuk do të ketë më mesatare si shpatë Demokleu që të pengojë ata të hyjë në universitete.

Përkundrazi dyert e universiteteve do të jenë të hapura dhe pas përfundimit, qeveria do të paguajë çdo sipërmarrës që punëson të rinjtë, 1 vit sigurime shoqërore për çdo të ri të punësuar.

Qeveria do të përcaktojë grante për çdo biznes dhe startup të të rinjve tanë. Qeveria do të përcaktojë grante për çdo kredi, në mënyrë që çdo çift i ri të ketë një çati. 30 mijë euro për të mbuluar të gjitha interesat dhe më pas me fëmijën e tretë për ata që duan, qeveria do të paguajë vetë të gjithë kredinë.

Miqtë e mi, do të bëjmë gjithçka, do të bëjmë çdo gjë që të kthejmë nga emigracioni të rinjtë dhe të rejat që ikën, por dhe çdo emigrant që do të kthehet në Shqipëri.

Prova e jetës sonë, prova e forcës tonë, e vizionit tonë, është të kthejmë kombin në moshën e rinisë tij. Ky është qëllimi ynë.

Kombi, vetëm kombi në moshën e rinisë, është komb me të ardhme, është komb që zhvillohet është komb që begatohet gjithnjë e më shumë”,-tha Berisha./CNA