web counter
LEXO PA REKLAMA!

SHKARKO APP

App Store
Google Play

E fundit!

x

Kuvendi miraton ndryshime në komisionet parlamentare/ Balla: Rritet mbikëqyrja ndaj institucioneve

29 Shtator 2025, 11:29, Politikë CNA

Kuvendi miraton ndryshime në komisionet parlamentare/ Balla: Rritet

Kuvendi i Shqipërisë ka miratuar ndryshime të rëndësishme në fushën e përgjegjësisë së komisioneve parlamentare, duke ndjekur një model të ngjashëm me atë të parlamenteve të vendeve anëtare të Bashkimit Europian.

Sipas modelit të ri, Komisioni për Nismat Qytetare dhe Mbikëqyrjen Institucionale do të ketë një rol më aktiv në procesin e raportimit dhe mbikëqyrjes së institucioneve të pavarura, përmes mbledhjeve të përbashkëta me komisione të tjera, të parashikuara në nenin 37 të Rregullores së Kuvendit.

Kreu i grupit të Socialistëve, Taulant Balla theksoi se neni 103, i cili rregullon raportimin vjetor të institucioneve të pavarura, nuk funksionon në vakum, por lidhet ngushtë me dispozita të tjera të Rregullores. “Raportimet e institucioneve ndër vite kanë lënë për të dëshiruar dhe kjo është konstatuar në mënyrë të vazhdueshme. Mbikëqyrja duhet të jetë më dinamike dhe të mos kufizohet vetëm në raportime vjetore,” ka thënë Balla në mbledhjen e Konferencës së Kryetarëve.

Në kuadër të procesit të integrimit në BE, Kuvendi synon të rrisë efektivitetin e funksionit të tij mbikëqyrës dhe transparencën e institucioneve të pavarura. Po ashtu, është kërkuar rishikimi i nenit 103, për të reflektuar realitetin institucional dhe nevojat aktuale të monitorimit parlamentar.

Në përfundim, Balla nënvizoi edhe nevojën për rishikimin e rolit të KKIE-së, në përputhje me këto zhvillime të reja. Gjithashtu, u bë një thirrje për sqarimin e kompetencave mbi mbikëqyrjen e Komisionerit për Mbrojtjen e të Dhënave Personale dhe Mjetet e Informimit, çështje për të cilën pritet që të japë një interpretim kryetari i Komisionit të Ligjeve, pas sugjerimit të bërë nga Kryetari i Grupit Parlamentar të Partisë Demokratike.

Këto ndryshime pritet të kontribuojnë në përmirësimin e funksionimit institucional të Kuvendit dhe në forcimin e mekanizmave të kontrollit dhe llogaridhënies, në përputhje me standardet europiane.

“Kuvendi ka miratuar fushën e përgjegjësisë së komisioneve.

Modeli i ndjekur është një model që funksionon në shumë parlamente të vendeve anëtare të BE-së. Është normale që Komisioni i Nismave Qytetare dhe Mbikëqyrjes Institucionale të përfshihet në raportimin e institucioneve të pavarura, në mbledhje të përbashkëta.

Nenet janë të ndërlidhura. Nuk është në vakum neni 103, por lidhet ngushtë me të tjera dispozita. Ne kemi nenin 37 të Rregullores (mbledhjet e përbashkëta), i cili zgjidh çështjen e zhvillimit të këtyre mbledhjeve.

Në përfundim, nuk ka asnjë problematikë, pasi Rregullorja i ka të parashikuara këto situata. Raportimet e institucioneve të pavarura ndër vite kanë lënë shumë për të dëshiruar dhe kjo është konstatuar në mënyrë të vazhdueshme. Kjo mënyrë raportimi nuk duhet të jetë vetëm një herë në vit, por duhet të bëhet periodikisht. Në këtë fazë ku ndodhemi, në procesin e integrimit në BE, Kuvendi i Shqipërisë duhet të ngrihet në lartësinë e kërkuar, duke e bërë procesin e mbikëqyrjes më funksional. Ka ardhur koha të rishikojmë nenin 103 të Rregullores.

Edhe KKIE duhet riparë në dritën e këtyre ndryshimeve. Duke përmbyllur fjalën time, mendoj se propozimet janë të mira, me një saktësim që duhet ta sqarojë kryetari i Komisionit të Ligjeve, i cili lidhet me Komisionerin për Mbrojtjen e të Dhënave Personale dhe Mjetet e Informimit, sipas sugjerimit të kryetarit të Grupit Parlamentar të PD-së”, tha Balla./ CNA





Lajmet e fundit nga