web counter
LEXO PA REKLAMA!

SHKARKO APP

App Store
Google Play

E fundit!

x

Kur Marashi vishte këmisha me inicialet E. H.

14 Qershor 2025, 13:22, Politikë CNA

Kur Marashi vishte këmisha me inicialet E. H.

Partia Demokratike ka zgjedhur që në KQZ të përfaqësohet nga juristi Marash Logu.

Kohët e fundit në sallën e seancave të mbledhjeve të KQZ-së, Marashi ka nisur të prezantohet edhe me një ose 2 shoqërues. Zoti Logu bëri përshtypje kur u fut në sallë bashkë me një asistent, i cili në nisje të seancës u ul në krah tij. Por pas disa minutash u dallua që zoti Logu i tha diçka në vesh asistentit dhe ai u ngrit e u spostua në karriget e rreshtit të dytë.

Kamerat nuk duhet të ngatërroheshin. Përfaqësuesi i Berishës në KQZ është vetëm Logu dhe jo edhe të tjerë.

Një ditë më pas zoti Logu arriti në sallën e mbledhjeve me 2 asistentë. Por kësaj radhe udhëzimet ishin dhënë më parë. Zoti Logu hyri rëndë-rëndë, ndërsa asistenti e ndiqte nga pas me një dosje në krahë. Pasi zoti Logu u sistemua në rreshtin e parë, asistenti i vendosi dosjen në tavolinë dhe tashmë e dinte mirë se ku duhej të ulej.

Ky është Marash Logu sot.

Po kush është Marash Logu?

Marash Logu e ka nisur karrierën e tij si jurist në zyrën e Eduard Halimit. Dikur ministër Drejtësie dhe më pas deputet, zoti Halimi njihet edhe për promovimin në PD të Gazment Bardhit.

Nga klikimi i lajmeve të vjetra dhe prononcimeve për shtyp të zotit Halimi kuptohet qartë që edhe Gazment Bardhi e ka zhvilluar karrierën e tij ditën që zoti Halimi u bë ministër Drejtësie. Halimi gjithashtu ka përshëndetur zgjedhjen e Gazment Bardhit si sekretar i Përgjithshëm i Lulëzim Bashës. Më tej gjithçka është histori e njohur.

Kurse Marash Logu, deri ditën që vazhdonte të punonte në studion e avokatisë së ish-ministrit Halimi, postin më të lartë e ka pasur si këshilltar i zonjës Vokshi në Komisionin Parlamentar të drejtuar prej saj. Edhe aty si rekomandim i ish-ministrit Halimi!

Më pas Logu nisi të shfaqej në pozicionin e këshilltarit të grupit parlamentar demokrat, ndërkohë që paralelisht vijonte punën edhe në studion e suksesshme të ish-ministrit Halimi.

Është ende koha kur sjellja e Marash Logut, në raport me njeriun që i kishte shkruar karrierën, ishte në nivele shumë të larta respekti.

Marash Logu vishte këmisha me inicialet E. H.!

Kjo jo domosdoshmërisht kishte të bënte me adhurimin e zotit Logu ndaj bamirësit të tij.

Në fakt jeta e Logut ka nisur mes bamirësisë së të tjerëve. E kjo për shumëkënd do të nënkuptonte një Marash të brumosur me ndjenjën e mirënjohjes ndaj kujtdo që i shtrinte dorën për ta ndihmuar.

Marashi e ka origjinën e tij përtej Vaut të Dejës, në Malësinë e Madhe. I rritur dhe ushqyer nga kisha e zonës, kjo ishte një e dhënë që i ka krijuar me sa duket besimin zotit Halimi te njeriu që vendosi të fuste në derën e biznesit të vet privat. E natyrisht edhe ndjesinë e së mirës që duhej të bënte për të ndihmuar një djalë të ri të diplomuar në drejtësi.

Kështu me sa kuptohet kur Halimit nuk i duheshin më këmishat me inicialet E. H. ato i duheshin Marashit!

Deri ditën që Marashi filloi të përfytyronte një asistent që i qepej nga pas për t'i mbajtur dosjet.

Nga ajo ditë bashkëbiseduesit e tij e gjenin duke dëgjuar me habi Marashin të përfliste dhe shante njeriun, këmishat e të cilit i kishte ende në trup. Inicialet E. H. vijonin ndërkohë në mëngët e këmishave të Logut, ndërsa ai shante "pronarin" e atyre inicialeve.

Eduard Halimi si biznesmen dhe avokat i suksesshëm nuk e kishte luks të tepruar veshjen e këmishave me inicialet e veta, por ndoshta ato iniciale Logu i dinte sigla të rrobave firmato, se nuk shpjegohet dot si mund të shash njeriun që të ka dhuruar këmishën e vet e mbase edhe përtej këmishës.

Ky është Marash Logu me iniciale M. L.

Mos u habisni kur t’i shihni ato iniciale të shfaqen në mëngët e këmishave të Marashit. Mirënjohja nuk është në natyrën e Marashit, por mbase një gjë mund ta ketë mësuar nga mentori i tij./ CNA





Lajmet e fundit nga