Kontrollet në banesë/ Veliaj nxjerr helmin, akuza BKH-së dhe SPAK-ut

10 Dhjetor 2024, 09:45, Politikë CNA

Kontrollet në banesë/ Veliaj nxjerr helmin, akuza BKH-së dhe

Erion Veliaj ka nxjerrë gjithë helmin e tij të mbajtur për brenda pas kaq kohësh që ndodhet nën hetim nga SPAK-u për dosjet e nxehta si ajo e inceneratorëve, “5D”, shembjet te “5 Maji”, shembjen e teatrit apo hetimin pasuror.

Sot në një reagim të gjatë në rrjetet sociale, pasi pak ditë më parë mbylli komentet, ka sulmuar agjentët e BKH-së dhe SPAK-un për kontrollet e kryera në banesë.

Sipas Veliajt, agjentët nuk kanë pasur vendim gjykate për të kontrolluar banesën, por pavarësisht kësaj së bashku me bashkëshorten e tij kanë vendosur të lejojnë hetuesit të bëjnë veprimet.

“Në datën 5 dhjetor jam nisur për një takim zyrtar me kryetarin e Bashkisë së Hamburgut, dhe të nesërmen, në 6 dhjetor, isha në Dhomën e Tregtisë së Hamburgut, për të promovuar aty, për operatorët e interesuar gjermanë, Zonën e Lirë Ekonomike të Tiranës - TEDA.

Në mëngjesin e 6 dhjetorit, bashkëshortja ime, e gjendur në shtëpi vetëm me djalin tonë, më telefonon pasi grupi i Prokurorisë së Posaçme kishte trokitur në derën e apartamentit tonë. Natyrisht, ndamë pa asnjë ngurrim bindjen se duhet të ishim plotësisht transparentë me trokitësit tanë.

Pavarësisht se pa një vendim gjykate për të hyrë në shtëpi dhe plus një situate të pakëndshme për gjithë lagjen ku jetojmë prej 12 vjetësh, në një pallat të ndërtuar 15+ vjet më parë (poshtë të cilit ishin mbledhur me lajmërim, nga kushedi se kush, altoparlantët mediatikë, që ishin vendosur si dikur te radha e qumështit përpara se të arrinte vetë grupi hetimor), bashkëshortja ime është treguar plotësisht bashkëpunuese dhe transparente me grupin hetimor, për çdo kërkesë të tyre, madje i ka shoqëruar vetë, qoftë në zyrën e saj, qoftë në shtëpinë e prindërve.

Kjo është e gjithë ngjarja, e cila tregoi se as jetoj në vila të pajustifikuara, as kam apartamente të padeklaruara, si hienat dhe plot nga korbat që më sulmojnë nga dita e parë e kësaj detyre. Nuk kemi as llogari në Qipro apo kudo qoftë tjetër, dhe as transferta të majme dhe të padeklaruara për ndërhyrje estetike, si po këta që, kur i kap SPAK-u është SKAP, ndërsa kur duan të linçojnë të tjerët në publik është SPAK. Ah po, nuk kemi as para të padeklaruara dhe as taksa të papaguara nga të ardhurat tona, si shumë prej korbave të tyre”, shkruan Veliaj ndër të tjera./ CNA