Interpelancë për mbështetjen ndaj fermerëve/ Shehaj-Sallës: Shpresojmë të keni vjedhur vetëm lekët e BE-së

21 Maj 2026, 14:43, Politikë CNA

Interpelancë për mbështetjen ndaj fermerëve/

Kryetari i Partisë Mundësia, Agron Shehaj, dhe ministri i Bujqësisë, Andis Salla, kanë zhvilluar interpelancë në seancën e sotme në lidhje me fondet për bujqësinë. Shehaj duke u ndalur te skema e re e mbështetjes për bujqësinë, pyeti se pse nuk kanë nisur ende aplikimet dhe kush është pengesë për këtë mosfillesë, ministria apo korrupsioni i AKSHI-t.

Drejtuar ministrit të Bujqësisë, Shehaj i tha se shpreson që të jenë vjedhur vetëm fondet e IPARD-it dhe jo dhe ato të skemës.

Gjatë fjalës së tij, Shehaj tregoi në seancë edhe një audioregjistrim të një fermeri, ku, sipas asaj, që dëgjohej, fermeri i kërkonte falje ministrit për një nga reagimet e bëra në takimet me ministrin dhe kryeministrin Rama.

“Në shkurt të këtij viti keni thënë se fondet e IPARD do të zhbllokohen brenda 6-mujorit të parë të 2026.

Një tjetër çështje për ndihmën e fermerëve ishte skema e naftës, të cilën e mbyllët dhe nxorët një skemë tjetër. Në lidhje me zbatimin dhe shpërndarjen e këtyre 52 milionë eurove, s’ka filluar akoma aplikimi. Shpresojmë të keni vjedhur vetëm lekët e BE-së jo dhe këto. Varet nga ministria apo nga fakti që AKSHI është pushtuar nga një bandë kriminale. Një fermer që guxoi dhe foli në një nga takimet e detyruar t’u kërkonte falje”, tha Shehaj.

Ministri i Bujqësisë, Andis Salla, në përgjigjen ndaj Agron Shehajt tha se nuk mund të zhvillohet interpelancë për fondet e IPARD, pasi është çështje nën hetim. Ndërsa sa i përket skemës së re për mbështetjen e fermerëve, Salla bëri me dije se aplikimet fillojnë më 25 maj, skemë kjo e ndërtuar mbi prioritetet e sektorit.

Ministri tha se po ashtu do të bëhen edhe pagesat për sipërfaqet e mbjella si dhe mbështetje shtesë për produktet blegtorale të shitura.

“Zhvillimi i interpelancave për çështje nën hetim do të cenonte ndarjen e pushteteve. Në lidhje me IPARD 3, është dorëzuar paketa e aplikimeve. Sa i përket naftës dhe mbështetjes nga shteti për kompensim të kostove të prodhimit, aplikimet fillojnë më 25 maj. Kjo skemë është ndërtuar mbi prioritetet dhe nevojat e sektorit.

Mbështetja nuk po ulet, por po rritet me një prioritet më të mirë. Skema e këtij viti synon të afrohet me modelet që zbatohen në BE. Ndryshimi nuk lidhet me mungesën e vëmendjes, por me mënyrën se si ndërtohet mbështetja. Për herë të parë nis dhe pagesa për sipërfaqet e mbjella. Fermerët do të përfitojnë edhe mbështetje shtesë, prej 10% të faturës së produkteve blegtorale të shitura prej tyre”, tha Salla.