Ina Zhupa, akuza të forta socialistëve/ “Jeni terroristë mjedisorë”

19 Dhjetor 2024, 11:03, Politikë CNA

Ina Zhupa, akuza të forta socialistëve/ “Jeni terroristë

Deputetja Ina Zhupa

Deputetja Ina Zhupa hodhi akuza të forta ndaj qeverisë në interpelancën me ministren e Turizmit dhe Mjedisit, Mirela Kumbaro.

Teksa foli për ligjin e ri për Zonat e Mbrojtura, Zhupa i cilësoi socialistët si terroristë mjedisorë.

Ajo deklaroi se mazhoranca ka betonizuar 5.8 milionë m2 tokë për investime strategjike dhe tani u është sulur zonave të mbrojtura.

Fjalimi:

Në shkurt të këtij viti në një seancë të turpshme pa diskutime kaluat ligjin e ri për Zonat e Mbrojtura, një ligj klientelist që zhdukte mbrojtjen e këtyre zonave me rëndësi jetike për vendin dhe hapte rrugën e ndërtimeve për to.

Ministrja e Ndërtimit, Kumbaro, e mohoi që do prekeshin zonat e mbrojtura, por u deshën vetëm 7 muaj që t'i miratonin projektvendimet që prekin 9 zona të mbrojtura, miratuar 25.09.2024 dhe publikuar ne Fletoren Zyrtare Nr. 165, date 27/09/2024. Ajo që vihet re është ulja e mbrojtjes, nga shkalla e parë në shkallën e tretë.

Kumbaro është ministrja më jetëgjatë sepse është ministrja më duargjatë ndaj pasurisë kulturore dhe natyrore në Shqipëri.

Ku nise me VKM në 2017, përndryshe nga harta e Ansamblit të monumenteve të kulturës së vitit 2000, la jashtë qendrës historike një pjesë të madhe të territorit, ku gjenden pjesa dërrmuese e objekteve historike të qytetit të Tiranës dhe Teatrin Kombëtar. Vazhdove me qofterinë në Butrint dhe marrëveshjen e parë kuadër me AADF për koncesionin e tij. Më tej në janar 2022 hoqe zona të tëra nga zonat e mbrojtura. Për ta nbyllur me këtë ligj të ri që shkatërron përfundimisht zonat e mbrojtura.

Në funksion të betonizimit të zonave të mbrojtura keni vendosur edhe të shtyni për herë të pestë afatin e ligjit për investimet strategjike, me një deputete që fatkqesisht përfaqëson edhe qarkun tim në kuvend, po në këtë rast nuk është propozuese po firmëtare.

I miratuar si një ligj i përkohshëm në vitin 2015, ai ka shërbyer për të betonizuar kryesisht bregdetin, duke u dhënë 5.8 milionë metër katrorë tokë investitorëve strategjikë në të gjithë vendin.

Jeni Terrorist Mjedisor. Keni betonizuar 5.8 milionë m2 tokë tregon qartësisht se shtetit vetë i mbaruan llokmat e tokave publike për miqtë dhe kemi hapur tepsinë e zonave të mbrojtura, parqet tona kombëtare, pasurinë që ua kemi detyrim fëmijëve tanë.

Edhe pse qëllimi i deklaruar i ligjit investimeve strategjike ishte thithja e investimeve të huaja deri më tani ky ligj ka ‘shpërblyer’ shumë klientë, pushtet, ndonjë gaztor oborri, edhe deputet e familjar të tyre.

Tashmë duket qartësisht që lidhet me interesin e ZMA sepse një nga ndryshimet që propozon deputetja lidhet me dhënien e atributit këtij komiteti për të vendosur për dhënien në përdorim për investitorët strategjikë të brigjeve të deteve, lumenjve dhe liqeneve për stacione plazhi. Oo burra pasi i morët tokën, tani detet dhe liqenet dhe përgatisni një ligj që t'i merrni edhe ajrin.

Në 2022 ju hoqët statusi zonë e mbrojtur dhe iu hap rrugë investimeve, në zonën urbane të Ksamilit, plazhin e Manastirit, të Pasqyrave, Pulëbardhave, Gjirit të Hartës e deri në kufirin jugor si Gjiri i Marinës e gjiri i Pemës së Thatë.

Po ashtu ai vendim tkurri 15 % të sipërfaqeve në bregdet, ku u prekën mijëra hektarë në zonën e Vjosë-Nartës Velipojës, Divjakë-Karavastasë si dhe në Kune.

Qeveria tha asokohe se i rriti sipërfaqet e zonave të mbrojtura me 27%, por në fakt në këtë përqindje futen zona të thella malore, dhe tek rikufizimi i zonave u hoqën mijëra hektarë vijë bregdetare e zona me rëndësi strategjike, të cilat u hapën rrugë investimeve./ CNA