Flet Këshilltari i Presidentit: Do ketë luftë juridike të paparë në këto 34 vite

4 Tetor 2025, 08:48, Politikë CNA

Flet Këshilltari i Presidentit: Do ketë luftë juridike të

Bajram Begaj

Ilir Kulla është këshilltar i jashtëm i Presidentit Bajram Begaj.

Nga hapësira televizive e emisionit "Zonë e Lirë", Ilir Kulla paralajmëroi betejë që nuk e kemi parë në 34 vite për rastin Veliaj.

Ai parashikoi edhe që Veliaj do fitojë Gjyqin në Strasburg dhe që Tirana do ketë dy kryetarë Bashkie.

Kurse për dekretin e shefit të vet ai thotë që Begaj duhej t'i ishte drejtuar Venecias sepse shkarkimi ishte i kundraligjshëm.

Nëse këtë këshillë ja ka dhënë edhe Presidentit dhe ai eventualisht nuk ja paska marrë në konsideratë, atëherë nuk themi dot që Begaj ja mbushi mendjen stafi që të firmoste dekretin.

Të paktën Ilir Kulla si staf, i paska vënë në tavolinë edhe sugjerime alternative. Për hir të së vërtetës, Venecia ishte opsion që nuk i kish shkuar ndër mend asnjërit deri tani. Por Presidenti e paska hedhur në kosh këtë propozim.

"Ka një proces që duhet shpjeguar. E para ka ndodhur një shkarkim politik nga partia. Me Veliajn, PS ka bërë praktikisht një divorc, dhe këtë e shpreh përmes kërkesës për zgjedhje të parakohshme.

Pastaj është pjesa juridike, ku Këshilli Bashkiak ka votuar me konsensus PD-PS për shkarkimin e kryetarit të bashkisë, me justifikimin se s’ka ardhur në punë. Ata kanë bërë një gabim trashanik, sepse ai ka bërë kërkesë që do marrë pjesë në mbledhje, dhe e kanë refuzuar. Këtu është lapsusi i parë.

Ndodhemi në një konflikt juridik ku Veliaj dhe avokatët e vet po bëjnë atë që i duhet, për të paraqitur fakte në Strasburg, mbi të drejtat e shkelura. Begaj mund t’i shkruante Komisionit të Venecias, dhe mund t’i thoshte s’i shpjegohet në këto raste, dhe do merrte një shpjegim.

Në javët e ardhshme do shohim një luftë juridike që s’e kemi parë më parë. Parashikoj që Bashkia e Tiranës do jetë me dy kryetarë bashkie. Parashikoj që Veliaj do shkojë në Strasburg dhe nga aty do vijë i fituar, që shkarkimi ka qenë i paligjshëm, dhe shteti shqiptar do duhet ta paguajë për gjithë dëmet që i janë bërë. Do shohim një luftë politike dhe juridike që s’e kemi parë më parë"./ CNA