Enver Hoxha, në listën e personaliteteve/ Këlliçi: Skandaloze dhe kriminale

6 Tetor 2025, 09:23, Politikë CNA

Enver Hoxha, në listën e personaliteteve/ Këlliçi:

Deputeti i Partisë Demokratike, Belind Këlliçi, ka postuar një foto në rrjetet sociale ku shihet se Kuvendi i Shqipërisë ka futur në listën e personaliteteve të muajit tetor edhe Enver Hoxhën.

Këlliçi shkruan se kjo është skandaloze dhe kriminale. Më tej, demokrati shkruan se si deputet i Kuvendit dënon me forcë normalizimin e së keqes dhe kërkon të tërhiqet menjëherë ky material.

Këlliçi thotë se përveç tërheqjes së materialit duhet t’u kërkohet dhe falje familjeve të prekura nga krimet e Enver Hoxhës.

“Instituti Parlamentar i Kuvendit dhe “ringjallja” e Enver Hoxhës!

Skandaloze, kriminale dhe e turpshme futja e figurës së Enver Hoxhës në listën e personaliteteve të muajit tetor nga Kuvendi i Shqipërisë!

Diktatori që prodhoi një regjim terrori, shtetin më të izoluar, popullin më të varfër e të shtypur të Europës radhitet ndër figurat e nderuara të kombit, krahas Sulejman Delvinës, Migjenit, Naim Frashërit, Abdyl Frashërit dhe at Gjergj Fishtës.

Sikur ky të ishte thjesht gabimi i një burokrati apo patronazhisti të lodhur që kopjon nga Ëikipedia, edhe mund të merrej lehtë kjo “shkarje” parlamentare dhe tallje me shqiptarët.

Mirëpo duke konsideruar mijra të vrarët e të pushkatuarit, por mbi të gjitha mbi 5 mijë të viktimat e komunizmit, të cilëve nuk u gjendet as varri dhe eshtrat, mijëra të burgosur e familje të internuara dhe një popull të tërë të traumatizuar e të mbajtur të rrethuar me tela me gjemba, kjo është e patolerueshme në çdo aspekt.

Tendenca të tilla të manipulimit të historisë tregojnë për një përpjekje djallëzore për të ringjallur mitet e historiografisë komuniste, ku kriminelet konsiderohen heronj të popullit dhe mendësia totalitare helmon mendjet e të rinjve, duke e bërë regjimin monist jo vetëm të pranueshëm por edhe të dëshirueshëm.

Si deputet i Kuvendit të Shqipërisë e dënoj me forcë normalizimin e së keqes, duke konsideruar rezolutat e miratuara për dënimin e krimeve të komunizmit, orientimin demokratik të Republikës së Shqipërisë dhe qëndrimin pa asnjë dyshim kundër diktaturës si koncept dhe diktatorit më kriminel dhe gjakatar të historisë shqiptare.

Kuvendi i Shqipërisë duhet menjëherë të tërheqë këtë material dhe ti kërkojë ndjesë publike shoqërisë shqiptare dhe mijëra familjeve të prekura nga krimet e Enver Hoxhës”, shkruan Këlliçi.