web counter
LEXO PA REKLAMA!

SHKARKO APP

App Store
Google Play

E fundit!

x

Denoncon Muçollari/ “Stadiumi ‘Selman Stërmasi’ nga tempull sportiv, në kullë betoni”

10 Shtator 2024, 15:16, Politikë CNA
Denoncon Muçollari/ “Stadiumi ‘Selman Stërmasi’
Anëtari i Kryesisë së Partisë Demokratike, Grigels Muçollari

Anëtari i Kryesisë së Partisë Demokratike, Grigels Muçollari, denoncoi këtë të martë një tjetër aferë të Bashkisë Tiranë.

Muçollari tha se stadiumi “Selman Stërmasi” do të varroset dhe në vendin e tij pritet të ngrihet një tjetër kullë.

Ai deklaroi se kështu do të shtohet betonizimi i kryeqytetit, ndërsa nuk parashikohet asnjë hapësirë e gjelbër.

Muçollari ftoi qytetarët të reagojnë kundrejt një akti të tillë.

Deklarata e plotë:

Ndodhemi këtu pranë stadiumit, që e njihni të gjithë, “Selman Stërmasi” apo ish-stadiumi “Dinamo”, ku luan skuadra e zemrës së shumë shqiptarëve, Tirona, së shpejti do të varroset nën projektin e radhës “kullë me biznese”, me beton, por pa gjelbërim.

Si përherë bashkautorët e kësaj maskarade janë dyshja famëkeqe, lubitë e betonit dhe korrupsionit, Erion Veliaj dhe Edi Rama.

Në këtë vendim që kanë bërë gati dhe në relacionin shoqërues që kemi arritur të sigurojme për këtë projekt të ri të gllabërimit të hapësirave publike, flitet gjithë kohës për të ardhura, për përfitim ekonomik, për zonë me interes të lartë, për qira të majme etj.

Asnjë fjalë për park, gjelbërim, mjedis çplodhës, hapësirë urbane etj.

Në planin që ka Erion Veliaj me Edi Ramën për këtë stadium emblematik të qytetit të Tiranës, pak ose aspak flitet për sport, për futboll, për përmirësim të kushteve, për rritje të cilësisë, për nxitje të të rinjve.

Thjesht, e gjitha shihet si një mundësi e artë për Kullë.

Për një, për disa, për shumë kulla ndoshta, në një truall prej 27 446 m2.

Projekti nuk është bërë publik.

Padyshim që ai projekt ekziston, është vendosur ndërkohë në ndonjë paradhomë të errët, apo në ndonjë drekë a darkë. Me siguri është caktuar dhe fituesi.

Publikut i jepen tani disa copëza informacioni.

Dhe djalli fshihet në detaje si këto: rijetëzim, rienergjizim.

Sa herë që Rama dhe Veliaj përdorin këto fjalë, aty do të shfaqet një kullë. Kanë përdorur argumentin e degradimit të pronës. Po pse kush e la këtë pronë te degradojë? Pikërisht të njëjtet njerëz që do ta kthejnë në kulla.

Erion Veliaj mesa duket ka mësuar nga kolegët e SPAK-ut dhe kësaj radhe ka bërë kujdes që të fshihet pas Këshillit Bashkiak, ndryshe nga inceneratori ku me firmën dhe urdhrin e tij eklipsoi institucionet.

Këshilli duket se e ka marrë vendimin, është ky dokumenti këtu, vetëm pret rastin ta kalojë për votim, aty ku do të ngrihen kartonët që këtë pronë publike, këtë stadium të qytetit, ta kthejnë në domen të Edi Ramës.

Ku është interesi publik këtu?

A janë dakord qytetarët e Tiranës që këtë aset të kryeqytetit t’ia kalojnë Edi Ramës, i cili do ja japë një miku të tij, i cili do të ndërtojë një kullë, një biznes qindra miliionë eurosh.

Çfarë përfiton kjo zonë, e cila është e mbytur nga betoni?

Çfarë përfitojnë këtu fëmijët, të rinjtë, të moshuarit?

Çfarë përfiton futbolli, tifozët, dashamirësit e ekipit të Tiranës?

Askush nuk përfiton asgjë, përveç Edi Ramës, Erion Veliajt dhe mikut të tyre ndërtues që ndërkohë i është bërë kjo dhuratë, vendimi është marrë.

Banorët e Tiranës dhe shqiptarët do ta mësojnë më vonë.

Kjo pra është “Shqipëria 2030”, që Edi Rama ju fton ju që ta votoni pas 6 muajsh.

Grabitje prone, përfitim personal, biznes, pasurim i një grushti njerëzish.

Betonizim, trafik i rënduar, ajër i rënduar.

Duhet të reagojmë kundër këtij gllabërimi!

O sot, o kurrë!/ CNA





Lajmet e fundit nga