web counter
LEXO PA REKLAMA!

SHKARKO APP

App Store
Google Play

Berisha: Paraqita në Strasburg rrezikun që Rama përbën për shqiptarët

29 Janar 2026, 13:05, Politikë CNA

Berisha: Paraqita në Strasburg rrezikun që Rama përbën

Kryetari i PD-së, Sali Berisha, ka zhvilluar një konferencë për mediat në selinë blu ku ka folur lidhur me vizitën e tij në Strasburg.

Berisha u shpreh se gjatë qëndrimit të tij atje ka paraqitur me fakte dhe dokumente situatën “dramatike” në Shqipëri. Ndër të tjera ai ka shtuar se ka paraqitur rrezikun që kryeministri Edi Rama, sipas tij, përbën për shqiptarët.

“U ktheva mbrëmë pas një qëndrimi si anëtar i Asamblesë Parlamentare të Këshillit të Europës dhe një aktiviteti intensiv në tempullin e demokracisë europiane. Ditët e qëndrimit në Strasburg u përdorën për dënimin me forcën më të madhe, për paraqitjen e fakteve, dokumenteve mbi situatën dramatike në narko-shtetin e Shqipërisë. Diktaturën autoritare në Shqipëri!

Në grupin parlamentar të Partisë Popullore, në seancat plenare të Asamblesë Parlamentare, siç mund t’i keni ndjekur, paraqitëm rrezikun e madh që organizata kriminale, qeveri shqiptare, e kryesuar nga Edi Rama paraqet jo vetëm për shqiptarët, por paraqet për mbarë Europën.

Ne informuam dhe paralajmëruam të pranishmit se Edi Rama përbën një rrezik madhor për vendet e tyre pasi ai është padrino sot i karteleve më të fuqishme të drogës në Europës, të cilat eksportojnë drejt Europës, zënë vendin e parë në eksportin drejt Europës të marijuanës, janë aksionerët më kryesorë në tregun e kokainës dhe heroinës.

Janë transportuesit më kryesorë të drogës nga Amerika Latine në portet e kontinentit europian dhe kanë për porte të lira të gjitha portet e Shqipërisë. Informuam për qindra e qindra leje, hotele, resorte turistike, kulla korrupsioni dhe droga të dhëna pas zgjedhjeve të 11 majit nga Edi Rama si shpërblim për pjesëmarrjen e gjerë të tyre në zgjedhje”, tha Berisha. /CNA





Lajmet e fundit nga