E fundit!

08:01 Kosova & Bota

Çfarë është stresi ekstrem i nxehtësisë?/ Brenda fenomenit vdekjeprurës që po përhapet në të gjithë Evropën

Sipas një studimi të ri të madh, disa pjesë të Evropës po ...

Shqipërinë nuk e rrezikon komunizmi, por politika e korruptuar

8 Dhjetor 2022, 14:30, Opinione Mentor Kikia

Në 8 dhjetor 1990 nisi protesta e pare, që i dha një të shtyrë komunizmit që kishte falimentuar ekonomikisht dhe politikisht, por kishte frikë të dorëzohej vetë. Pasi kishte rënë në të gjithë Europën Lindore dhe pasi në Bukuresht çifti Çaushesku ishte ekzekutuar nga populli, në Tiranë, s’kishte kush mendjen më për të qëndruar në pushtet, por si të shpëtonin kokën.

E megjithatë, 8 Dhjetori është dita që shënon fillimin e kryengritjes që rrëzoi komunizmin…. historia është shkruar tashmë.

Por sot, 32 vjet pas dhjetorit 1990, të thërrasësh sërish poshtë komunizmi, apo të “kujtojmë për të mos u përsëritur historia”, mua më duket naivitet i madh.

Shqipërinë nuk e rrezikon aspak komunizmi sot. Sepse edhe sikur Enver Hoxha dhe e gjithë shpura e tij të ringrihen nga varri, komunizmi nuk rikthehet. Komunizmi kishte 25 vjet që po eksperimentohej si model politik dhe ekonomik kur Shqipëria iu bashkua.

Dhe ishin rrethana të tjera historike e gjeopolitike, jashtë vullnetit dhe mundësisë së shqiptarëve, ato që përcaktuan se në cilin bllok do të bënte pjesë Shqipëria pas Luftës së II.

Sot Shqipërinë nuk e kërcënon komunizmi, por korrupsioni!

Sot nuk janë komunistët armiqtë e Shqipërisë, por politianët, zyrtarët që vit pas viti e qeveri pas qeverie, po e zhvasin këtë vend e këtë popull, duke e detyruar të braktisë, në një largim me përmasa historike, vendin e tij.

Ndaj ta harrojmë komunizmin, edhe sikur të duam ne, ai regjim nuk rikthehet, sepse ajo ishte ideologji e përbotshme e s’mund ta ringjallim ne.

Ne duhet të luftojmë sot politikën e korruptuar që është duke e dëmtuar këtë vend edhe më shumë sesa komunistët.