E fundit!

22:05 Politikë

“Filloi numërimi mbrapsht, kapitujt mbyllen brenda 2027-ës”/ Rama ndan videon nga Brukseli

Kryeministri Edi Rama ka ndarë një video nga Brukseli ku s...

Për Martinin!

19 Nëntor 2024, 21:25, Opinione Arian Galdini

Arian Galdini

Ndalojini:

Të gjitha emisionet televizive vulgare e banale.

Të gjitha debatet e përndezura me sherrnaja e kotësi, me ulërima e gafurrje politikanësh, analistësh, VIP-ash, e gjithëfarësoj a turlisoj “të famshmish”, nëpër TV Kombëtare e lokale.

Të gjitha transmetimet live të Parlamentit, aktiviteteve politike, konferencave për shtyp të politikanëve.

Ndalojini të gjitha kanalet, faqet e profilet në rrjetet sociale ku flasin, shfaqen e “lulëzojnë” gangot e Dubait, horrat, qelbësirat e sharjeve e pështymave, promovuesit e banalitetit, maskarallikut, dhunës, mediokritetit, ulërimave, gjobëvënieve, e famës nga budallalliku e fëlliqësia.

Duhet një Pakt Kombëtar i Mbrojtjes së Fëmijëve.

Emisionet vulgare e banale, le ti bëjnë televizionet në kanale me pagesë, e kushdo ti shohë le ti shohë duke shprazur portofolin e në qafë pastë veten, por në TV Publike, Kombëtare e Lokale, nuk duhen lejuar më fëligështia e VIPave injorantë, apo e VIPëzimit të injorantëve e debilave.

Gazetarë, analistë, media, mos rendni pas klikimeve e fitimeve prej marrëzisë e fëlliqësisë.

Ju lutem, ju lutem, kemi përgjegjësi prindëruese të gjithë.

Fëmijët tanë janë si sfungjer e dhe e thithin të gjithë këtë mënxyrë publike, politike, mediatike e të rrjeteve sociale, por nuk e përpunojnë dot.

Ju lutem, t'i mbrojmë fëmijët.

Të prindërojmë.

Prindër, ju lutem, e di që lodhja nga punët e ditët e vështira, nga streset e dertet e jetës ju bëjnë të zgjidhni që të shihni me telekomandën tuaj, gjërat më pa mendim që ju duken si më shtyrakohëset e më çlodhëset, por mendoni se çfarë shihni ju në televizorët tuaj në shtëpi është vetëm maja e ajsbergut e çfarë shohin fëmijët tanë në rrjetet sociale.

Prindërimi e ka të ndaluar lodhjen.

Të prindërojmë.

Të bëhemi vigjilentë në çfarë shohim në ekranet tona në shtëpi që tu shembullzojmë fëmijëve tanë më të mirën e mundshme.

Prindër, mos e shihni më Parlamentin, mos ndiqni më debate e sherrnaja, mos ndiqni banalitetin e VIPëzuar, e as banalët, vulgarët e gjytyrymat e VIPëzuar.

Mos i ndiqni as VIP-at e fëlliqësuar.

Po nuk i bëmë këto sot, do të jetë shumë vonë nesër.

Pikë.