Nëse Gjokutaj ka të drejtë, në 3 mars vula i takon Foltores

23 Shkurt 2023, 16:22, Opinione CNA

Avokati Genc Gjokutaj ka bërë një analizë dhe arsyetim juridik shterues për fatin e seancës së parë të gjyqit të Vulës të njoftuar për datën 3 mars.

Gjokutaj sqaron se Grupimi i Alibeajt nuk ka kërkuar të jetë palë kur shqyrtohej depozitimi i ndryshimeve të statutit të bërë nga Foltorja.

Alibeaj dhe juristët e shquar të Lulit, nuk pretendonin të ishin palë në atë proces.

E vetmja kërkesë që ankuesit (Alibeaj & Co) kanë bërë gjatë gjykimit në Shkallë të Parë ka qenë përjashtimi i gjyqtarit të çështjes Z. Agron Zhukri nga gjykimi i çështjes! Kjo kërkesë i ka kaluar për shqyrtim gjyqtarit Z. Arben Konstandini, i cili ka vendosur rrëzimin e kërkesës së Alibeaj & Co pikërisht për shkak të mungesës së legjitimimit aktiv të Lulzimsave.

Me shumë gjasa, gjykatës do t'i duhet që t'i përcjellë Lulzimsat në shkallën e parë, ku do t'u duhet të hapin një padi themeli.

Kjo do të thotë që në këto zgjedhje PD do përfaqësohet nga Rithemelimi.

Më tutje, do rrojmë e do shikojmë!

Gjyqi i vulës së PD/ Gjokutaj: Apeli është i detyruar të mos pranojë ankimin e Alibeajt
23 Shkurt, 16:14

Postimi i plotë i Genc Gjokutajt:

"Më datën 3 mars, Gjykata e Apelit Tiranë nuk do të gjykojë statutin e Rithemelimit të PD-së, të datës 11 dhjetor 2021, pasi:

1. Gjykata e Apelit në fillim të gjykimit, në bazë të ligjit, verifikon praninë e palëve dhe legjitimimin aktiv të tyre dhe posaçërisht legjitimimin e ankuesit (Alibeaj &Co) që ka ankuar çështjen!

2. Gjatë verifikimit të legjitimimit aktiv të ankuesit (Alibeaj & Co), Gjykata e Apelit do të konstatojë se ankuesi jo vetëm që nuk ka qenë palë në gjykimin në Shkallë të Parë, por as e ka kërkuar një gjë të tillë me kërkesë për njohjen e tyre (Alibeaj & Co) si palë e interesuar!

3. E vetmja kërkesë që ankuesit (Alibeaj & Co) kanë bërë gjatë gjykimit në Shkallë të Parë ka qenë përjashtimi i gjyqtarit të çështjes Z. Agron Zhukri nga gjykimi i çështjes! Kjo kërkesë i ka kaluar për shqyrtim gjyqtarit Z. Arben Konstandini, i cili ka vendosur rrëzimin e kërkesës së Alibeaj & Co për përjashtim të gjyqtarit Z. Agron Zhukri pikërisht për shkak të mungesës së legjitimimit aktiv! Pra i palegjitimuari për të kërkuar përjashtimin e gjyqtarit të Shkallës së Parë u legjitimoka që të ankohet ndaj vendimit të këtij gjyqtari (Agron Zhukri), siç në mënyrë haptazi të kundërligjshme ka ndodhur!

4. Në këto kushte Gjykata e Apelit është e detyruar që në fillim të gjykimit të vendosë mospranimin e ankimit të ankuesit (Alibeaj & Co) për mungesë të legjitimimit aktiv të tij pa i hyrë fare dhe pa shqyrtuar shkaqet e paraqitura në ankim!

Kjo është rruga ligjore dhe kështu do të ndodhë! Kush mendon dhe shpreson ndryshe, nuk mund të ndihmohet dot as me presion politik dhe as me para!”./ CNA.al