LEXO PA REKLAMA!

SHKARKO APP

Gestapo

22 Shkurt 2024, 09:31, Opinione Artan Fuga

Gestapo

Dëgjoja një ditë administratorin bullafiq të një gjoja universiteti privat, që tregonte se institucioni, pronë private e familjes së tij, kishte rregulla strikte, cilësi, modernitet.

Në ditë provimi? - tha.

Ça thua? Unë bëj terror, mo, terror.

E çfarë janë këta studentët? Mashtrues të mëdhenj, horra, por mua nuk ma hedhin dot.

Provime, s'kaaaaaaa, s'lë unë të bëj njeri giliviliiiiiiii!

Rrup-sup ua bëj! As bëhet fjalë!!!

E shihja dhe herë më dukej si kujdestari surrat patate i filmit, tani kush ia mban mend emrin, herë si oficer gestapoje te filmi lista e Shindlerit, herë si polic kampi internimi në Tepelenë, herë si karagjoz.

Nuk e di pse!

Dhe vazhdoi:

Telefonin e mbajnë në xhep maskarenjtë kurse në vesh fusin kufje sa një fasule. Prandaj, fillimisht, kush futet në klasë e kontrolloj nga veshët!

I zhvesh nga veshët!

Kokërr për kokërr fasuleje i kontrolloj. U fus nga një shtizë në vesh.

Nja dyve u ka ngel fasulja në vesh dhe kanë shkuar në spital për t'i operuar. Sa u futën anestezinë, e pohuan vetë te doktori se përse e kishin bërë.

S'kaaaaa, pse sylesh jam unë!

Sa futen studentët në sallë u mblidhen librat, fletoret, letrat që mund të kenë, xham çdo gjë, telefonat bëhen grumbull aty te banka e parë. As miza nuk lejohet të kalojë.

Se çfarë bëjnë ca goca? Fusin kopje poshtë minifundeve. Prandaj, gjëja e parë, ul kokën dhe shoh se mos ndokush lëviz këmbë a dorë.

Nuk ka vajtje në banjë në provim. Kur dikush ngre pretendimin se ka nevoja personale, kuptohet se përse e bën! Atyyyy, i them, ça kishe për të bërë ta bëje para provimit!

Fletët ku shkruhen shtjellimet janë të sekretuara mooooo. Ku di pedagogu se çfarë korrigjon!!! Ashtu në tym! Madje shpesh provimet i korrigjojnë sekretaret.

Pedagogu i vendos notën në fillim, pastaj e çon fletoren në sekretari, që këndej bëhet lidhja e kodit me emrin e studentit. As emër as gjë prej gjëje. Emrat në fletore janë zëvendësuar me shifra të koduara: 007, 5 fraksion 1, 17 17, e kështu me radhë.

Pastaj nis një fazë tjetër. Provimet kalohen në sitë. Po u gjetën tri fjali që janë afërsisht të njëjta në dy fletore të ndryshme, menjëhere skualifikohen të dyja. Kam dhjetë veta që kontrollojnë fjalitë.

Se teknologjia ecën. E kupton vetë ti!

Tani kam gjetur një gjë tjetër. Ditën e provimit vë në funksionim një aparaturë që ndalon valët telefonike si edhe Internetin në të gjitha hapësirat e universitetit tim, në pronësi. E bëj black out fare.

Terror, mo po të them! S'ka valë! Fillimisht studentët nuk e kuptonin se përse nuk kishin valë. Unë shkrihesha se i shihja se ç'bisedonin me njëri-tjetrin.

Imagjino edhe në çantat e vajzave vë nja dy sekretare të kontrollojnë. Kurse dyert e hyrjes i kam bërë si në Rinas. Skanohet çdo gjë!

Erdhi një kontroll cilësie nga lart! Kur pa se çfarë masash merrnim ne, iku pa zë!

Bravo ! - na tha! Kështu duhet bërë, burg mo burg! Izolohet studenti nga bota e jashtme, si Navalni mo në Siberi! Dhe aty testohet ça di!

E dëgjoja, tundja kokën dhe pikëllimi më kishte kapur të gjithin!

15:02 Opinione Lutfi Dervishi

Sot nuk ka lajme…

Ajo që sot mendohet e pa imagjinueshme, - një ditë pa lajm...

Lajmet e fundit nga