E fundit!

10:16 Politikë

Murrizi paralajmëron Berishën: Koha e këllirave duhet të marrë fund ose do fundoseni

Ish-deputeti i Partisë Demokratike, Myslim Murrizi, ka rea...

Burrat e munguar të vendit tim

23 Prill 2025, 14:57, Opinione Ilir Levonja

1) Dje në Prishtinë një gazetare e pyeti kryeministrin Kurti se kur do të ndalosh e të flasësh me ne? Por ai nuk ndaloi, madje as i hodhi sytë. I rrethuar nga katër a pesë truproja shkoi në punën e vet. Menjëherë thashë që u infektua edhe Prishtina me sëmundjen e Tiranës. Megjithëse ka kohë që ka zënë nga lëçitjet edhe plot idiotër mbi termin kosovar dhe shqiptar. Kjo padyshim vërteton atë që ne për bythën tonë, me një fjalë karrigen, apo për xhepin, me një fjalë interesin makut personal, djegim edhe kombësinë, edhe qeverinë, edhe vatanin. Dhe nesër mos u çudisni që kjo kastë makutërish të shpallë shtete autonome edhe treva të tjera si Myzeqeja apo Labëria etj.

2) Kur them që u infektua edhe Prishtina, pasi thuajse pjesa dërrmuese e kishim model kulturën politike në Dardani. Ndërrimin e pushtetit, zgjedhjet plot hijeshi, aleancat, debatet televizive të hapura ku dominonte ekonomia dhe politikat sociale etj. Tani edhe aty janë ngulur në pushtet dhe zbehja e debatit ka kapur totalisht sharmin tironc të studiove, ku njëshat nuk preferojnë të japin llogari. Thuajse të gjitha studiot e mëdha në Tiranë merren me opozitën dhe partitë e vogla dhe askush nuk bën bilance të paktën të katër viteve të fundit se çfarë u bë me këtë apo atë iks investim etj.? Kryeministri bërtet si i do në "Instagram", madje gjoja do t'i mbushë mendjen një bujku të falimentuar për pasaportën europiane, ndërkohë që prodhimet bujqësore, vijnë nga Serbia. Televizonet e falimentuara totalisht ngaqë nuk kanë konkurrencë, por përkrhaje financiare nga tenderimet bizarre, i shkojnë nga pas retorikës bullizuese të një kajmekami otoman.

3) Kujtoja se vendi im kishte burra dhe do t'ia hidhnin një kavanoz salce në kokë idiotit. Ju quan çyrykë dhe u kërkon llogari grarisë sikur t'i ketë pula koteci. Nuk po kuptoj më..., ka apo nuk ka burra ai vend? Është çmenduri ore, ky devijim publik nga demokracia.

Ka mbetur apo nuk ka mbetur ndonjë socialist që ta mbajë në shina demokracinë, brenda asaj partie. Ka degraduar gjithçka në fyerje publike dhe "burrat" gajasen. Mund të fërkosh duart me gaztorin, por është një 'show' mental që nuk ka lidhje fare me ekonominë tuaj, të drejta dhe liritë e njeriut. Ti thuash masës, mos voto, mos i lini burrat tuaj çyrykë të votojnë etj., është mender një bullizëm social publik. Është demokraci zotërinj, bëhen bilance, bilance parash se janë paratë tuaja, nuk janë as të Ramës dhe askujt tjetër. Ka debate studiove dhe ka llogaridhënie. Asnjë nga këto nuk ndodh, temat janë bajate, u quan çyrykë, bufa, llum, kopje autike. Madje kjo e fundit është një brutalitet social, pasi autizmi ka kthyer sot gjindjen e një familje apo individi në tipin e vuajtjes së mitit të Sizifit. Është e përditshme dhe nder e respekt për ata fëmijë e ato familje, madje botës mbarë ka projekte dhe institucione që kujdesen deri në shenjtëri për këtë dramë globale. Edi Rama tall menderen. Ka burra aty, apo jo? Burrëri nuk do të thotë vetëm të marrësh dyfekun. Ka plot forma të tjera.

4) Një fushatë normale në demokraci, hap debatin studiove, jepet llogari në panele koferancash për shtyp, diskutohet me detaje, ishte fondi kaq për këtë projekt, sa u harxhuan, sa firo pati etj.? Çfarë përfituam? Se këto firot ua mbajnë pensionet në kategorinë e lëmoshave dhe jo të pagës. Nuk ka lekë Shqipëria, kaq është buxheti vjetor dhe është e pamundur të rritet pensioni. Ka ore ka, po i vjedhin, vetëm sikur mosvjedhja të ndodhte do i kishit trefish pensionet. Asgjë nuk ndodh, del tjetri diku dhe fillon e bullizon me fjalorin më të ulët dhe paturpësisht kërkon mandatin e katërt. Nuk vdes Shqipëria po ike ti ore. E kishim dikur të injektuar nga diktatura e proletariatit se, po të ikte xhaxhi Enver, do na pushtonin të huajt. Hap ore panelin me gazetarin, hap studion e debatit se kështu ndodh në botë. Nga këtej dalin edhe rezultatet e sondazheve, pastaj grupet e punës përkatëse përmirësojnë pika të veçanta dhe njerëzit dinë se kë të votojnë. Në Shqipëri del Edi Rama dhe quan bilanc, bufin, kënetën, çyrykllëkun apo autizmin dhe pika sondazhet na e nxjerrin fitues./ CNA