Beteja për Shkupin mes Uashingtonit dhe Kremlinit!

27 Prill 2024, 15:25, Opinione Azgan Haklaj

Raundi i parë i zgjedhjeve presidenciale në Maqedoninë e Veriut konfirmoi jo vetëm paprekshmërinë e autoritetit të BDI-së dhe të shqiptarëve Ali Ahmeti, por dhe me kuota të rritura elektorale.

Duket qartë se shqiptarët dinjitozë dhe patriotë janë mirënjohës për luftën çlirimtare të udhëhequr nga Ali Ahmeti që u hoqi prangat e dhunës, përçmimit, denacionalizimit, deskriminimit, shpopullimit dhe përçmimit si komunitet etnik nga falangat sllavo-maqedone për dhjetëra dekada.

Po ashtu shqiptarët dinjitozë e atdhetarë u duk qartë se ruajnë të paprekur në subkoshiencën e memorien e tyre mbi dy dekada luftë politike e strategji të mirëmenduar nga Ali Ahmeti në këtë shtet ku intervenojnë qindra influenca serbo-ruse, për të rikthyer jo vetëm autoritetin moral e lirinë e shqiptarëve, por duke avancuar në faktorizimin e tyre institucional shtetëror.

Rezultatet e sotme dhe realiteti janë të pakonceptueshme edhe në imagjinatën më të avancuar të dikujt 22 vite më parë. Por realiteti është kokëfortë dhe gjakftohtë.

Një Maqedoni dikur e dominuar nga fryma e dhuna sllave, sot është Maqedonia e Veriut që ka në qendër të metropolit të saj duke u valëvitur flamurin e kombit shqiptar dhe monumentet e Skënderbeut e Nënës Terezës.

Një Maqedoni që në këtë fillim shekulli e kishte herezi gjuhën shqipe sot ka disa universitete shqiptare ku studiojnë krenarisht të rinj e të reja nga të gjitha trevat tona etnike. E cila fantazi e kritizerëve mediokër në mos të shitur do ta mendonte se shqiptarët do përfaqësoheshin jo vetëm me deputetë dhe kryetarë komunash në të gjithë vendin, por kryetar parlamenti, kryeministër, ministra e zv/ministra të portofoleve kryesore të këtij shteti?

Siç është i saktë postulati "Liria ka emër: “UÇK", është po aq i saktë konstatimi real se kjo tablo e arritjeve të tilla të paimagjinueshme të shqiptarëve në Maqedoninë e Veriut ka emër të përveçëm: “Ali Ahmeti dhe BDI". Por zgjedhjet e fundit presidenciale dhe ato parlamentare po evidentojnë një anë tjetër të Ali Ahmetit ku materializohet jo vetëm strategjia dhe nuhatja politike, por dhe ana e tij humane dhe perëndimore evropiane.

Ai duke njohur dhe vlerësuar principet njerëzore e politike të bashkekzistencës në një shtet multietnik arriti të tubojë rreth vetes parinë politike të komuniteteve pakicë me një qëndrim thellësisht demokratik me vizion të qartë euroatlantik.

Natyrisht që është e lehtë ta dizajnosh këtë histori në letra e imagjinatë, por është e vështirë ta materializosh. Dhe kalvari i vështirësive është akoma i freskët e në mos dhe sot vazhdon... Vetëm një gjeni politik, një idealist e atdhetar me kurajë të pashoq si Ali Ahmeti arriti të gërshetojë e t'i jetësojë interesat jetike e përspektive të shqiptarëve në Maqedoninë e Veriut.

E gjithë kjo luftë e ky realizim epik ka ndodhur në një fushë të minuar siç vijon të jetë Maqedonia e Veriut, minuar nga nacionalizmat e influencat hegjemoniste maqedone, serbe, bullgare e greke duke pasur frymëzim antishqiptar e antishtet të dirigjuar në Kremlin.

E për paradoks e fatkeqësi kombëtare që na ndodh shpesh në histori këtij kori malinj antishqiptar i bashkohen si në kohët e fundit me ose "pa dashje", nga etja për protagonizëm dhe mitomania e egoizmi disa liderë shqipfolës si Albin Kurti apo ish-presidenti Ilir Meta (Metaj) Këto gjeste që u manifestuan në kulmin e fushatës elektorale në Maqedoninë e Veriut për ta definuar me epitetin më të lehtë janë mjerim e miopi për të mos thënë troç: Tradhti. Ndaj është rasti i vetëm sot që shqiptarët e Maqedonisë së Veriut të ndezin sinjalin “SOS" për të mirën e vet dhe të bashkojnë votat dhe vullnetet pranë koalicionit proeuroatlantik të Ali Ahmetit.

Reflektimet dhe dëshpërimi pas Kuvendit nuk kanë vlerë. Është rast unik, jo vetëm për shqiptarët, por për çdo komunitet që aspiron një shtet të qëndrueshëm dhe demokratik të përqafojnë filozofinë e Ali Ahmetit.

Nëse do të këtë lajthitje kjo do të jetë rruga e hapur për kalin e Trojës të gatitur në Kremlin e po shalohet në Beograd jo vetëm për destabilizim, por edhe për ndarje e shkatërrim të shpejtë të këtij shteti, anëtar i NATO-s dhe aspirues potencial për t'ju bashkuar Unionit Evropian.