web counter
LEXO PA REKLAMA!

SHKARKO APP

App Store
Google Play

E fundit!

x

Sadik Bejko rrëfen takimin me At Arthur Liolinin/ “Një legjendë dhe një kombinim mrekullish”

29 Shtator 2023, 21:15, Kulturë CNA

Sadik Bejko rrëfen takimin me At Arthur Liolinin/ “Një

Shkrimtari dhe profesori, Sadik Bejko, ka dhënë një mesazh ngushëllimi për At Arthur Liolinin, i cili u nda nga jeta në moshën 80 vjeçare.

Bejko tregon takimin me At Artur Liolinin në Mitropolinë e vjetër të Gjirokastrës në vitin 1991 dhe nxjerr në pah disa nga karakteristikat e tij.

Ai e cilëson priftin si një legjendë dhe një kombinim mrekullish, ndërsa tregon rrezatimin dhe hijeshinë që ai përcillte, teksa bekonte gjirokastritët e i spërkaste me ujë borziloku.

Mesazhi i plotë i Sadik Bejkos:

Rekuiem për Atë Artur Liolinin

U hidhërova që nuk je më në këtë botë. Qofsh i parajsës atë Artur! U prehsh në paqe dhe në mirësinë ungjillore.

Atë Arturin e kam takuar në Gjirokastër më 1991. Në Mitropolinë e vjetër, në kishën e lagjes Pazari i Vjetër.

Ishte një burrë shumë simpatik për të qenë prift. Aq simpatik sa i shkonin për mrekulli mjekrra, kamillafi i zi prej kleriku ortodoks. Shtati i lartë.

Sadik Bejko rrëfen takimin me At Arthur Liolinin/ “Një

Portreti i tij ishte fetar, po aq fetar sikur ta kishe gdhendur në skulptura klerikale të lashta. Zëri i tij i pastër, në një shqiptim të qartë, në tonalitet prej basi të ngrohtë vinte prej Korçe. Ishte një kombimim mrekullish. Një klerik shqiptar elegant modern prej Amerike dhe njëherësh klerik që të çonte në Rilindje e më larg.

Një legjendë e gjallë në atë kishë po na vinte rrotull. Njëherësh, njeri i bukur, priftëror, fantast dhe krejt i prekshëm. Klerik? I mbështjellë me mister? Jo, burrë konkret, me ca degë borziloku në duar, borzilok të zhytur në ujë. Psaltëte me zë prej basi dhe na spërkaste. Uji i tij i shenjtë na rrëshqiste mbi flokë, mbi ballë. Ujë dhe borzilok që ne... pak më parë, pas kërkesës së tij, ia kishin vënë në duar.

Ai ishte një prift që vinte drejt nga katedra e Fan Nolit. Dhe kishte mbirë i gjallë aty para nesh. Prift që... mua po më spërkatëte me ujë. Degë të plota nga borziloku ynë zhyteshin në enën plot ujë... dhe atë Artur Liolini na spërkaste... duke thirrur me zë të lartë lutje dhe psalme, thërriste fjalë, vargje tekstesh ungjillore. Por për ne të harruara, të pakuptuara.

Ju kam pagëzuar me borzilokun dhe ujin "tuaj", na thoshte ai. Vetëm zëri dhe lutjet ngjanin të ishin të atij. Tekstet shin të Ungjillit.

Mua atë Arturi më ka "pagëzuar". Më lagu me ujë borziloku Gjirokastre. Nga uji dhe borziloku im. Dhe e pranoja këtë prej atij.

Po sa i bukur, sa i hirshëm klerik, po ç'prift i pashëm që ti... na ishe!

Unë - një krijesë komuniste e tjetërsuar nga çdo fe, si secili prej atyre rreth e rrotull meje. Unë - një i rrafshuar nga hekuri i skuqur komunist mbi kokën time; një krejt trushpëlarë i komunizmit. Kështu isha.

Por pagëzimin me borzilok e ujë të lagjes sime prej dorës së Atë Liolinit si përtëritje nga vapa e nga zhuri i gjatë....po e pranoja.

Ai klerik, ai atë Arturi, me atë zë grykor e të lashtë prej korçari qënkej yni. Në jetë të jetëve ishte e paskej qenë yni. Dhe ja: kishte ardhur nga larg. (Pse na u vonove kaq shumë? Ku ishe o prift i lashtë, pse u vonove kaq gjatë, o atë ?)

Po spërkateshim nga duart e tij me ujin dhe borzilokun tonë të Gjirokastrës.

Ai po na kthente te lutjet e psalmet që ishin mbi 2000 vjet të qëmotshme. Te lutje e psalme që na i kishin mëkuar mbi djep gjysh - stërgjyshat tanë. Por ... tashmë i kishim harruar.

Aleluja, aleluja... po na spërkaste Atë Arturi me borzilok e me ujë të freskët, me ujë të qëmotshëm pusi. Nga uji i puseve tona.

Tani ti atë Arturi nuk je më. Ndjehem keq.

Aleluja! Qofsh i parajsës Atë Artur Liolin! Aleluja!

E pranova ujitjen tënde më 1991 si një shtrat i tharë lumi, që pret rrëkerat e shirave, që pret vlagën e rrjedhave të ujit gjerë e gjatë sipër tij. Pranova të lagem nga ai ujë pusi e borziloku si në një rit të lashtë. Në një rit ku paganët zhvisheshin që të lagen, që të pastrohen, që të shenjtërohen nga uji, kur prej qiejsh vrujon, kur prej qiejsh bie, kur binte dhe bie shi, shi... shi...

Aleluja... qofsh i parajsës atë Artur! Qofsh lart në paqe e në mirësi të përjetshme./ CNA





Lajmet e fundit nga