Një jetë kushtuar artit/ Ndriçim Xhepa feston 69-vjetorin e lindjes

21 Janar 2026, 14:38, Kulturë CNA

Një jetë kushtuar artit/ Ndriçim Xhepa feston 69-vjetorin e

Këtë të mërkurë feston ditëlindjen e 69-të aktori i mirënjohur Ndriçim Xhepa, një nga emrat më përfaqësues të teatrit dhe kinemasë shqiptare, i cili prej dekadash ka qenë i pranishëm në jetën artistike të vendit me role të rëndësishme dhe interpretime të vlerësuara.

I lindur në Tiranë më 22 janar 1957, Ndriçim Xhepa vjen nga një familje me traditë të spikatur artistike. Ai është djali i artistit Xhavit Xhepa dhe i aktores së madhe Margarita Xhepa, njërës prej figurave më të shquara të skenës shqiptare.

Një jetë kushtuar artit/ Ndriçim Xhepa feston 69-vjetorin e

Kjo trashëgimi artistike ka ndikuar dukshëm në rrugëtimin e tij profesional. Pas përfundimit të studimeve për aktrim, ai u angazhua në Teatrin Kombëtar, ku u shqua për seriozitetin, disiplinën dhe përkushtimin ndaj artit skenik.

Paralelisht me teatrin, Xhepa ka ndërtuar një karrierë të pasur edhe në kinematografi. Ai ka interpretuar në dhjetëra filma shqiptarë, duke krijuar personazhe të ndryshme që dallohen për thellësi psikologjike dhe forcë dramatike.

Një jetë kushtuar artit/ Ndriçim Xhepa feston 69-vjetorin e

Ndër filmat më të njohur ku ka luajtur janë “Hije që mbeten pas”, “Flutura në kabinën time”, “Dasma e Sakos”, “Shokët”, “Kohë e Largët”, “Telefoni i një mëngjesi”, “Duaje emrin tënd”, “Përdhunuesit”, “Unë e dua Erën”, “Kthimi i Ushtrisë së Vdekur”.

Gjatë karrierës së tij, Ndriçim Xhepa është vlerësuar me çmime dhe mirënjohje të shumta për kontributin në teatër dhe film. Ai është fitues i medaljeve për aktor në Festivalet V dhe VI të Filmit, si dhe tri herë fitues i Kupës për Aktorin më të Mirë në Festivalet e Filmit në vitet 1987, 1989 dhe 2000.

Po ashtu, ai është nderuar me Çmimin “Aleksandër Moisiu” për Aktorin më të Mirë në Festivalin Kombëtar të Teatrit në vitin 1995 dhe me Çmimin për Aktorin më të Mirë në Festivalin e Aktrimit “Apollon” në vitin 2004.

Përveç veprimtarisë artistike, Ndriçim Xhepa ka qenë i angazhuar edhe në transmetimin e përvojës profesionale te brezat e rinj, duke dhënë një kontribut të çmuar në pedagogji në formimin e aktorëve të ardhshëm dhe në vijimësinë e artit shqiptar./ CNA