E fundit!

18:57 Opinione Luan Rama

I PËGËRI I MBETUR GJALLË NGA NJË KOHË E VDEKUR

Në këto ditë të zhegëta vere, bashkë me rrjedhën kutërbues...

"Katedralja e Parisit", muzikal historik për herë të parë në skenën e teatrit të Korçës

29 Dhjetor 2025, 13:38, Kulturë CNA

Në skenën e teatrit “Andon Zako Çajupi” në Korçë, për herë të parë u vendos në skenë një muzikal i përmasave të mëdha. “Katedralja”, e frymëzuar nga vepra monumentale “Katedralja e Parisit” e Viktor Hygoit, solli për publikun korçar një spektakël që ndërthur aktrimin, vokalin dhe koreografinë.

Emra të njohur të skenës shqiptare si Gerald Murrja, Amri Hasanlliu, Arsi Bako, Mateus Frroku, Donald Shehu, mes të tjerëve, interpretuan artistikisht veprën romantike me famë botërore, duke u duartrokitur gjatë nga publiku.

Regjisori Xhuliano Brisku u shpreh se ky projekt ishte një guxim i madh artistik, i cili u kurorëzua me sukses në skenën e Korçës. Sipas tij, vepra ka shumë të përbashkëta me qytetin, duke e cilësuar Korçën si “Parisi i Vogël”, çka e bënte edhe më domethënëse vendosjen e këtij muzikalit pikërisht këtu.

“Jam shumë i lumtur që jam pjesë e teatrit të Korçës, si aktor. Ishte një çmenduri shumë e madhe që të vendosje në skenë, një guxim që u finalizua sot. Jam shumë i emocionuar sepse kjo është një kryevepër botërore dhe një sfidë e madhe për të gjithë. Katedralja e Parisit dhe Katedralja e Korçës kanë shumë të përbashkëta. Korça është Parisi i Vogël dhe pse të mos e sillnim këtë vepër në Korçë”, tha regjisori.

Tenori Gerald Murrja theksoi se bëhet fjalë për muzikalin e parë të vënë në skenë në teatrin e Korçës, ndërsa e cilësoi eksperiencën si një sfidë të veçantë profesionale, sidomos për shkak të kalimit nga opera te gjinia e muzikalit. Ai vlerësoi gjithashtu bashkëpunimin mes artistëve nga qytete të ndryshme të vendit.

“Besoj se në Korçë është muzikali i parë që vendoset në teatër. Kishte goxha ovacione, njerëzit na pritën shumë mirë. Për mua është një sfidë shumë e madhe sepse jam solist në TOB. Ka qenë pak e vështirë sepse në opera nuk duhen mikrofonat, kurse në gjininë e muzikalit po. Fat i madh që ne punojmë me aktorë dhe me këngëtarë shumë të mirë duke lidhur disa qytete si Shkodra, Dibra, Tirana”, u shpreh tenori.

Këngëtarja Arsi Bako e cilësoi këtë rol si një eksperiencë ndryshe dhe sfiduese, ku për herë të parë ndërthurte aktrimin, këndimin dhe kërcimin, ndërsa u shpreh se ky interpretim do të mbetet një moment i rëndësishëm në karrierën e saj.

“Ka qenë një eksperiencë ndryshe nga ç'kam bërë deri tani. Të bashkoja aktrimin me këndimin dhe kërcimin ka qenë një sfidë. Mendoj që është pritur shumë mirë dhe ndihem shumë e lumtur me këtë rol. Do ngelet gjatë në karrierën time”, tha këngëtarja.

Ndërkohë, aktori Amri Hasanlliu, në rolin e Kuazimodos, e përshkroi muzikalin si një nga sfidat më të vështira të karrierës së tij, veçanërisht për shkak të kërkesave vokale dhe fizike të personazhit, por vlerësoi reagimin pozitiv dhe duartrokitjet e publikut.

“Pak i lodhur, por në përgjithësi doli mirë. Një emocion, sfidë shumë e madhe, mesin e kam copë, por nuk jam i vetmi personazh kryesor. Pa Esmeraldën nuk do të kishim as Kuazimodon, as priftin, as kapitenin. Nga duartrokitjet e publikut m'u duk mirë. Ishte goxha e vështirë për vokalin pasi pozicioni i Kuazimodos ishte i vështirë. Ishte roli më i vështirë që kam pasur ndonjëherë në një muzikal”, tha aktori.

“Katedralja” shënon një hap të rëndësishëm për jetën artistike të qytetit të Korçës, duke sjellë për herë të parë në këtë skenë një muzikal të përmasave ndërkombëtare dhe duke zgjeruar më tej ofertën kulturore për publikun./CNA