E fundit!

19:17 Politikë

Nga Sekretari i Përgjithshëm te nënkryetarët/ Lista e kandidatëve për ekipin drejtues të PD-së

Në mbledhjen e Këshillit Kombëtar të PD-së, kryedemokrati ...

Kremtohet Shën Andoni në Elbasan/ Mesazhi i fortë i Mitropolitit

17 Janar 2024, 21:42, Kulturë CNA

Për orthodhoksët tradita e festimit të emrit eshtë një traditë e lashtë dhe lidhet me emrat e shenjtorëve që shkëlqyen me virtyte në jetën e tyre mbi tokë. Ata imituan Jezu Krishtin, Shën Marinë, apostujt dhe profetët. Kjo është arsyeja që të krishterët kur pagëzohen marrin një emër shenjtori, përshembull: Vasil, Kostandin, Elena, Maria, Gjergji, Sara, Ilia, Andon, etj etj emra shenjtorësh. Duke festuar të kremtet e këtyre shenjtorëve kujtohen edhe jetën e tyre dhe Kisha Orthodhokse nxit besimtarët e saj t’i imitojnë këta shenjtorë.

I tillë është edhe Oshënar Andoni i Madh, asket i njohur në mbarë botën i shekullit të 3-të.

Ai shiti gjithë pasurinë e tij dhe ua shpërndau të varfërve paratë. Iu përkushtua Zotit me lutje dhe kreshëm. Më vonë u denjësua të merrte dhuratë nga Zoti dhuratën e shërimeve të trupit dhe shpirtit. Ngushëlloi shumë njerëz, korrigjoi shumëntë tjerë me anë të fjalës së tij, por më shumë me jetën e tij të shenjtë.

Kremtimi i tij është vendosur nga kisha orthodhokse më 17 Janar. Ai konsideroheti edhe si ati i murgjërve.

E kremtja e Oshënar Andonit të Madh, merr një ngjyrim të veçantë festimi pasi feston diten e emrit Mitropoliti i Elbasanit, Hirësi Andoni.

Hirësia e Tij, Mitropoliti i Elbasanit, Shpatit dhe Librazhdit, Imzot Andon (Merdani), lindi më 7 dhjetor 1969, në Tiranë.

Në vitet 1996-1999, kreu studimet në Akademinë Teologjike “Ngjallja e Krishtit”, Shën Vlash, Durrës. Në vitet 2002-2006 studioi në Fakultetin Theologjik të Universitetit Kombëtar “Kapodistria” të Athinës. Përfundoi studimet master në “Dhiatën e Re” në Universitetin “Aristoteli” të Selanikut. Është diplomuar në nivelin master edhe në degën në “Sociologji – Psikologji – Komunikim” të Arsimit të Lartë “ISSAT”, gjithashtu është diplomuar në Universitetin “UBIS” të Gjenevës.

U qeth murg dhe u hirotonis dhjak nga Hirësia e Tij, Mitropoliti i Korçës, Joani, në vitin 2000. Më 21 nëntor 2002 u hirotonis prift nga Fortlumturia e Tij, Kryepiskopi i Tiranës, Durrësit dhe i Gjithë Shqipërisë, Anastasi. Më 21 nëntor 2006 u hirotonis episkop, duke u caktuar Episkop i Krujës (episkop titullar) dhe Ndihmës i Kryepiskopit dhe shërbeu si Protosingjel i Kryepiskopatës së Tiranës.

Me vendimin e Sinodit të Shenjtë për krijimin e Mitropolisë së Elbasanit, Hirësi Andoni u caktua Mitropolit i saj. Fronëzimi i tij u krye më 17 prill 2016 në Kishën e Shën Nikollës, Elbasan.

Në predikimin e tij në liturgjinë mbajtur me këtë rast në Kishën e Shën Nikollës, Elbasan Mitropoliti Andon theksoi kujdesin që duhet të kemi nga informacioni i padobishëm dhe shpesh herë i kotë që qarkullon në media tv dhe ato sociale.

“Gjithmonë e më tepër po del një brez që merret me kotësinë, më pak të interesuar të lexojnë dhe më shumë të interesuar të merren me gjëra të kota. Jemi në një fazë tjetër si shoqëri…” - shprehu në këtë mënyrë shqetësimin e tij Mitropoliti i Elbasanit Hirësi Andoni.

Në përfundim të liturgjisë hyjnore klerikët dhe besimtarët uruan Mitropolitin e tyre Andon për ditën e emrit. Në këtë ditë festojnë ata që mbajnë emrin: Andoni, Antoni, Antonio, Andonia, Andona, Antoneta, Antonela, Anduen, Anduena, Ndoni, Doni, Dona, Toni, Doke, Neta, Nela, Nia, Ndue, etj.

Dita e festimit të emrit është një traditë e lashtë dhe bukur për të krishterët orthodhoks, sepse sa herë që kremtojmë jetët e shenjtorëve na vjen në mendje jeta e virtytshme e tyre e zbukuruar nga mirësia, durimi, paqja, pajtim, ndihma për njeri-tjetrin, shpresa tek Zoti, besimi dhe mbi të gjitha virtyti i dashurisë për të cilën kemi kaq shumë nevojë në botën e sotme./ CNA