Koko Fest mbyllet mes emocioneve dhe triumfit të artistëve në Korçë

7 Shtator 2025, 11:33, Kulturë CNA

Koko Fest mbyllet mes emocioneve dhe triumfit të artistëve në

Pas shtatë netësh të mbushura me humor, emocione dhe art, në Korçë u ul perdja e edicionit të radhës të Koko Fest, një festival që tashmë është shndërruar në një nga ngjarjet më të rëndësishme kulturore të qytetit dhe më gjerë. Ky festival solli në skenën e teatrit “Andon Zako Çajupi” një mozaik shfaqjesh të larmishme, duke bërë bashkë trupa nga Shqipëria, Kosova, Maqedonia e Veriut, si edhe nga Italia, duke i dhënë ngjarjes një dimension gjithnjë e më të fortë ndërkombëtar.

Publiku korçar pati mundësi të ndjekë shfaqje që trajtonin tema të ndryshme, nga problemet e përditshme e deri te mesazhet e mëdha mbi dashurinë për jetën dhe vendin. Salla e teatrit ishte plot në çdo natë, duke treguar jo vetëm etjen e publikut për art cilësor, por edhe besimin se humori mbetet një nga format më të fuqishme për të reflektuar mbi realitetin. Në mbrëmjen e fundit u ndanë edhe çmimet, të cilat u shoqëruan me emocione të shumta për aktorët, regjisorët dhe trupat pjesëmarrëse. Nga aktorë të rinj që hodhën hapat e parë në skenë, deri te emra të njohur që u vlerësuan për karrierën e tyre, festivali i këtij viti u përmbyll duke lënë pas një atmosferë të veçantë artistike në Korçë.

Zamira Kita, aktore dhe drejtoreshë e teatrit të Korçës, u shpreh se publiku e priti ngrohtësisht festivalin dhe çmimet u shpërndanë me një vlerësim profesional e cilësor nga juria.

“Jam shumë e kënaqur që ja dolëm ta mbyllim me sukses Koko Fest. Sot ishte nata e shtatë, kemi patur prezente trupën e Prizrenit. Kemi patur trupa të ndryshme, edhe italiane sepse përpiqemi të hapemi me Koko Festin, ta bëjmë ndërkombëtar si festival. Mua më vjen shumë mirë që publiku e priti mirë dhe çmimet shkuan atje ku duhej, ku juria ka bërë një vlerësim të mirë, profesional, cilësor për të gjithë shfaqjet dhe pjesëmarrësit në Koko Fest. Personalisht jam e kënaqur që publiku e ndoqi shumë Koko Festin, shumë të ftuar kishim nga Tirana, Kosova, Maqedonia e Veriut por dhe që çmimi i aktores më të mirë u nda tek tre aktoret e shfaqjes tonë, pra Olta Daku, Egla Ceno edhe unë. Arti bëhet në grup dhe ne duke qenë të treja bashkë, ja dolëm ta fitonim këtë çmim”, tha Kita.

Koko Fest mbyllet mes emocioneve dhe triumfit të artistëve në

Aktorja Zamira Kita

Regjisorja Andia Xhunga fitoi pesë çmime me trupën e saj në këtë edicion, mes tyre “Shfaqja më e mirë” dhe “Regjia më e mirë”, si dhe çmimin e publikut. Xhunga u shpreh se është shumë e lumtur për çmimet e marra dhe për pritjen që u bëri publiku korçar.

“Jemi shumë të lumtur për këtë pritje që na bëri publiku korçar dhe juria për vlerësimet që na dha. Morëm 5 çmime. Ku ka më bukur duke filluar nga çmimi i publikut e të vjedhësh zemrën e publikut, po ashtu "regjia më e mirë", "shfaqja më e mirë", "aktori më i mirë protagonist" Gentian Zenelaj dhe "aktori më i ri" Aleks Seitaj. Jam shumë e lumtur, ishte një surprizë shumë e madhe. Gëzohem që mesazhi që vepra ka, ka përçuar të publiku dhe publiku gjen veten nga fillimi në fund në këtë vendin e vogël të humbur këtu në Shqipëri. Mesazhi i shfaqjes është që kur vendin e duam, pavarësisht se sa i humbur është ai dhe sa problematika ka, nëse punojmë çdo ditë nga pak me përkushtim e dashuri, vendi do të bëhet”, tha Xhunga.

Regjisorja Andia Xhunga

Në këtë mbrëmje të veçantë u vlerësua edhe një figurë e madhe e artit shqiptar, regjisori Gëzim Kame, i cili mori çmimin e karrierës. Kame u shpreh se ndihet shumë i nderuar nga teatri për këtë çmim të dhënë.

“Ndihem shumë i respektuar nga teatri i Korçës dhe nga qyteti, por në radhë të parë nga ky teatër që ka një histori të jashtëzakonshme në histori. Të marrësh çmimin e karrierës në këtë lloj teatri, më emocionoi vërtet. Humori sot është futur në një vorbull të ekonomisë së tregut, që synohet për të fituar e jo për të patur atë funksionin e vërtetë të saj. Ky humor i thellë që shqiptari e ka në përgjithësi, i mungon skenës shqiptare këtë periudhë”, u shpreh regjisori Kame.

Regjisori Gëzim Kame

Koko Fest u mbyll mes duartrokitjeve të publikut dhe emocioneve të artistëve, duke lënë pas shtatë netë të mbushura me art, humor dhe reflektim. Ky festival tregoi edhe një herë se Korça jo vetëm ruan traditën e saj, por është e aftë të prodhojë ngjarje me ndikim kulturor që kapërcejnë kufijtë lokalë. Synimi për të ardhmen është që Koko Fest të rritet më tej dhe të forcojë dimensionin e tij ndërkombëtar, duke sjellë në Korçë gjithnjë e më shumë trupa nga jashtë vendit.

Me këtë energji dhe me përkushtimin e artistëve, festivali po kthehet në një emblemë të qytetit dhe një hapësirë të rëndësishme ku arti takohet me publikun. Korça mbylli kështu një tjetër kapitull të suksesshëm kulturor, duke dëshmuar edhe një herë se është një qytet që jeton dhe frymon me artin./ CNA