web counter
LEXO PA REKLAMA!

SHKARKO APP

App Store
Google Play

Vrasësit e grave/ Nga Dan Hutra, tek Alfred Vefa dhe Naim Murseli

1 Janar 2024, 15:30, Kronika CNA
Vrasësit e grave/ Nga Dan Hutra, tek Alfred Vefa dhe Naim Murseli
Dan Hutra, Naim Murseli dhe Alfred Vefa

3 ngjarje të rënda kriminale tronditën shqiptarët gjatë vitit 2023. Një e ndodhur në Tiranë dhe Kamëz, një në Itali dhe një në Kosovë.

Në Tiranë dhe në Kamëz, Dan Hutra, i cilësuar si vrasësi serial i grave, ekzekutoi me armë 3 gra dhe plagosi 3 të tjera.

Në Itali, Alfred Vefa vrau ish-bashkëshorten e tij me armë dhe më pas edhe veten, raporton CNA.

Ndërsa ngjarja më e fundit është ajo e Liridona Ademajt në Kosovë, e cila u ekzekutua me porosi të bashkëshortit të saj Naim Murseli, pasi kishin darkuar me fëmijët e tyre të mitur.

CNA po sjell një rikujtesë të 3 masakrave që lanë shije të hidhur te shqiptarët në 2023-shin.

Masakra e Dan Hutrës

Vrasësit e grave/ Nga Dan Hutra, tek Alfred Vefa dhe Naim Murseli

Kryeqyteti trondit të mërkurën e 1 marsit nga krimet e 40-vjeçarit Dan Hutra, një ish-i dënuar, i cili vrau 3 gra dhe plagosi tri të tjera, në tri zona të ndryshme të Tiranës.

Fillimisht, me një mjet tip “Benz” të zi, ai shkoi në Astir me një kallashnikov dhe thikë brenda makinës. Dan Hutra plagosi me thikë ish të dashurën e tij, 40-vjeçaren iniciale M.G. dhe i mori asaj me dhunë një shumë parash.

Më pas, ai shkoi në banesën e ish-bashkëjetueses së tij në Kodër-Kamëz dhe plagosi më armë zjarri ish-bashkëjetuesen Elena Hysa dhe nënën e saj Kujtime Hysa.

Gjithashtu, ai vrau me armë motrën e ish-bashkëjetueses Mevlute Hysa dhe kunatën e saj Hasime Dafku.

40-vjeçari nuk u mjaftua me kaq, por shkoi në Bathore dhe vrau edhe 31-vjeçaren Etleva Kurti, raporton CNA.

Kjo e fundit ishte motra e Vladimir Kurtit, një person ky me të cilin Dan Hutra kishte pasur një debat të ashpër teksa vuanin të dy dënimin në të njëjtin burg.

Autori i pashpirt u arrestua disa orë më vonë dhe nuk shprehu pendesë për vrasjet, madje tregoi se kishte planifikuar të ekzekutonte edhe një person të katërt, një burrë në Vaqarr që e fajësonte për humbjen e jetës së babait të tij.

Dan Hutra ka një skedë të pasur kriminale ku përfshihen vepra të ndryshme penale për përdhunim, pengmarrje, vrasje, 2 tentativa të bujshme arratisjeje, sherret në burg, vjedhje, në total 20 vite histori kriminale.

Shqiptari vret ish-bashkëshorten në Greqi

Vrasësit e grave/ Nga Dan Hutra, tek Alfred Vefa dhe Naim Murseli

Mbrëmjen e datës 28 shtator, u ekzekutua me plumb në kokë në Castelfiorentino të Italisë, pak hapa larg Firences, 35-vjeçarja shqiptare Klodiana Vefa.

Krimi i krye nga ish-bashkëshorti i saj, Alfred Vefa. Ai i bëri pritë 36-vjeçares në mes të rrugës, teksa po kthehej nga puna, raporton CNA.

Pasi debatuan verbalisht, Alfred Vefa qëlloi me armë Klodianën, duke e lënë të pajetë.

Autori u largua nga vendngjarja dhe dy ditë më pas u gjet i vetëvrarë në makinë me armën që ekzekutoi ish-gruan e tij.

Klodiana Vefa punonte si kamariere në një restorant pranë vendit ku u vra.

Çifti kishte dy fëmijë, një djalë 17-vjeçar dhe një vajzë 14-vjeçare. Ata ishin divorcuar në Shqipëri disa vite më parë, edhe pse divorci nuk ishte regjistruar ende në Itali për shkak të problemeve burokratike.

Në Castelfiorentino edhe pse të ndarë ata jetonin së bashku, në të njëjtën shtëpi.

Edhe sot, nuk është zbardhur ende zyrtarisht shkaku i këtij krimi, ndonëse mendohet se Alfred Vefa ishte xheloz për shkak se ish-bashkëshortja e tij kishte krijuar një lidhje të re.

Familjarët e Klodianës kanë deklaruar për mediat se nuk kanë qenë në dijeni të divorcit dhe për më tepër të lidhjes së re të viktimës.

Vrasja e Liridona Ademajt

Vrasësit e grave/ Nga Dan Hutra, tek Alfred Vefa dhe Naim Murseli

Mbrëmjen e 29 nëntorit trojet shqiptare u tronditën nga vrasja e Liridona Muselit, bashkëshortja e ish-këshilltarit të Behgjet Pacollit, Naim Murseli.

Organizatori i vrasjes së të resë dyshohet se ka qenë vetë bashkëshorti i saj, Naim Murseli, kurse ekzekutori Granit Plava, bashkëfshatar i tij, raporton CNA.

Ngjarja ndodhi pak minuta pasi viktima dhe bashkëshorti i saj, së bashku me dy fëmijët e mitur kishin darkuar në një restorant.

Granit Plava, darkoi në të njejtin restorant me ta dhe i bëri pritë familjes Murseli kur ata po ktheheshin në shtëpi, duke u shtirur si grabitës.

Sipas dinamikës së ngjarjes, Naim Murseli mori fëmijët dhe u largua, duke lënë pas Liridonën me Granit Plavën. Ky i fundit qëlloi me armë, la të pajetë Liridonën dhe u largua nga vendngjarja.

Ndërkohë, bashkëshorti tentoi të fshehë gjurmën e tij dhe e shiti ngjarjen si vrasje aksidentale gjatë një grabitjeje.

Por veprimet e dyshimta të tij bënë që policia të zbardhte të vërtetën. Ai u arrestua së bashku me Plavën.

Ekzekutori deklaroi se Naim Murseli i kishte premtuar 30 mijë euro për të vrarë Liridonën, 15 mijë euro nga të cilat i kishte marrë para kryerjes së vrasjes dhe 15 mijë të tjera do t’i merrte më pas.

Naim Murseli fillimisht pranoi gjithçka dhe më pas e mohoi, duke dhënë disa versione të ngjarjes.

Në burg për këtë ngjarje ndodhen edhe Kushtrim Kokalla, pjesëtar i Forcës së Sigurisë së Kosovës, si dhe Tomë Dodaj, personi që dyshohet se i dha armën ekzekutorit.

Deri më tani nuk është zbardhur arsyeja se përse Naim Murseli urdhëroi vrasjen e bashkëshortes. Njëra nga pistat është sigurimi i jetës që Liridona Ademaj kishte në një kompani suedeze./ CNA





Lajmet e fundit nga