web counter
LEXO PA REKLAMA!

SHKARKO APP

App Store
Google Play

E fundit!

x

Zgjedhjet e 7 qershorit/ LVV propozon Kurtin si kandidat për kryeministër të Kosovës

9 Maj 2026, 16:40, Kosova & Bota CNA

Zgjedhjet e 7 qershorit/ LVV propozon Kurtin si kandidat për

Këshilli i Përgjithshëm i Lëvizjes Vetëvendosje është mbledhur sot dhe ka zgjedhur kryeministrin në detyrë të Kosovës, Albin Kurtin, si kandidat për Kryeministër në zgjedhjet e ardhshme që do të mbahen më datë 7 qershor 2026.

Pas zgjedhjes së tij unanimisht nga Këshilli, Kurti ka mbajtur fjalën e tij, ku foli mbi përpjekjet e LVV-së që vendi të mos shkonte në zgjedhje të panevojshme.

"Është një detyrim historik ky që unë e kam ndaj jush, është një detyrim që ne e kemi ndaj gjithë kombit tonë shqiptar dhe ndaj Republikës sonë. Këtë detyrë do ta përmbushim e s’na ndal dot askush, sepse sytë, veshët, mendjen, zemrën, i kemi të përqendruar te synimi ynë më sublim, përparimi i kombit. Lidhjes Demokratike të Kosovës i thamë ejani në bashkëqeverisje: zëvendëskryeministrin dhe katër ministri, që është dyfishi i asaj që ka Partia Guxo. Thanë jo. Atëherë edhe Lidhjes Demokratike të Kosovës edhe Partisë Demokratike të Kosovës ju thamë meqenëse e keni shumë hall që ne po i marrim tri pozitat e larta shtetërore, le ta bëjmë një rrokadë në kryesinë e Kuvendit, ku ju merrni kryetarin e Kuvendit, ndërkaq kryetarja jonë bëhet nënkryetare e nënkryetari juaj bëhet kryetar. Ose edhe kryetari i partisë le të bëhet kryetar, është çështje e tyre. Së pari, LDK-së, jo. PDK-së, po ashtu, jo’’, u shpreh Kurti.

Kryeministri në detyrë Albin Kurti, synon një mandat të ri pas fitores së LVV-së në dy palë zgjedhjet e vitit 2025, fillimisht në shkurt dhe më pas në zgjedhjet e jashtëzakonshme të dhjetorit.

LVV-ja tashmë ka konfirmuar edhe vazhdimin e koalicionit me Guxo-n, Alternativën dhe Partinë Shqiptare Demokristiane. Kujtojmë së kanë mbetur edhe tre ditë para përfundimit të afatit për dorëzimin e listave me kandidatët për deputetë për zgjedhjet e parakohshme parlamentare të 7 qershorit. /CNA





Lajmet e fundit nga