LEXO PA REKLAMA!

SHKARKO APP

Turqia “censuron” mediat ndërkombëtare/ Bllokon aksesin e “Deutsche Welle” dhe “Zërit të Amerikës”

3 Korrik 2022, 12:47, Kosova & Bota CNA
Turqia “censuron” mediat ndërkombëtare/ Bllokon
Flamuri i Turqisë

Turqia ka bllokuar aksesin e mediave të huaja “Deutsche Welle” dhe “Zëri i Amerikës”. Nga e enjtja, dy faqet e internetit nuk janë të aksesueshme në Turqi.

Këshilli i Lartë i Radios dhe Televizionit Turk (RTUK) tha se të dyja mediat nuk ishin në përputhje me "ligjin" dhe nuk aplikuan për licencë brenda periudhës së kërkuar. 

Në deklaratën e RTUK thuhet se dy mediat kishin nevojë për një licencë transmetimi në shkurt sepse kishin seksione "programi".

"Deutsche Welle" është transmetues ndërkombëtar publik gjerman, shtetëror, i financuar nga taksapaguesit gjermanë. "Zëri i Amerikës" drejtohet nga Agjencia Amerikane për Media Globale (USAGM), një agjenci qeveritare e financuar nga Kongresi Amerikan. 

"DW" tha në një deklaratë se nuk ishte në përputhje me rregullat sepse "licencimi do të kishte lejuar qeverinë turke të censuronte përmbajtjen editoriale".

"Medieve të licencuara në Turqi u kërkohet të fshijnë përmbajtjet në internet që RTUK i interpreton si të papërshtatshme. Kjo është thjesht e papranueshme për një transmetues të pavarur", u shpreh Peter Limbourg, drejtori i Përgjithshëm i "DW", teksa bëri të ditur se do të ndërmarrë veprime ligjore kundër bllokimit.

Ndërkohë, drejtoresha në detyrë e "Zërit të Amerikës", Yolanda López, tha se ata "kundërshtojnë me vendosmëri" vendimin e RTUK, që e cilëson si "një përpjekje të fshehtë për të censuruar raportimin e pafavorshëm të shtypit".

Nga ana tjetër, RTUK tha se funksionon mbi baza ligjore dhe se nuk ka nevojë që askush "të shqetësohet pa nevojë për lirinë e shprehjes dhe shtypit"./ B.A. – CNA.al

Lajmet e fundit nga