E fundit!

09:23 Aktualitet

Zbatimi i Aministisë Penale/ Dhjetëra të dënuar lënë burgjet në Korçë

Ka nisur zbatimi i Amnistisë Penale në institucionet e vua...

Çështja e abortit/ Gjykata e Lartë e Teksasit bën lëvizjen e papritur

2 Korrik 2022, 17:42, Kosova & Bota CNA

Gjykata e Lartë e Teksasit

Gjykata e Lartë e Teksasit bllokoi një urdhër të një gjykate më të ulët, që lejonte klinikat në këtë shtet, të vazhdonin të kryenin aborte edhe pas vendimit të Gjykatës së Lartë amerikane që hodhi poshtë një vendim të hershëm të saj të marrë në vitit 1973, që i ofronte mbrojtje kushtetuese abortit.

Nuk dihet ende nëse klinikat në Teksas, të cilat rifilluan kryerjen e aborteve vetëm disa ditë më parë, do t’i ndalonin shërbimet e tyre pas këtij vendimi të marrë të premten vonë në mbrëmje. Një seancë dëgjimore mbi këtë çështje është caktuar të mbahet në fund të këtij muaji.

Ky vendim i Gjykatës së Lartë të Teksasit që rrëzon vendimin e një gjykate më të ulët, dhe i marrë brenda një harku kohor njëjavor është tregues i paqartësisë së krijuar në të gjithë vendin që prej rrëzimit nga Gjykata e Lartë e vendit, të atij që njihet si çështja Roe kundër Wade.

Një urdhër i një gjykatësi të Hjustonit të martën u kishte siguruar disa klinikave që të rifillonin përkohësisht procedurat për abort deri në javën e gjashtë të shtatzënisë. Prokurori i Përgjithshëm i Teksasit, Ken Paxton, i kërkoi menjëherë të gjykatës më të lartë të shtetit, e cila ka në përbërjen e saj nëntë gjyqtarë republikanë, që ta pezullonte përkohësisht urdhrin.

"Këto ligje janë të paqarta, të panevojshme dhe mizore", thotë Marc Hearron, aktivist i Qendrës për të Drejtat Riprodhuese, pas vendimit të marrë të premten në mbrëmje nga gjykata e lartë e Teksasit.

Klinikat në Teksas, një shtet me rreth 30 milionë banorë, ndaluan kryerjen e abortit pas vendit të Gjykatës së Lartë të vendit që rrëzoi Roe kundër Wade.

Klinikat që kryejnë aborte si dhe pacientët në të gjithë vendin vazhdojnë përpjekjet për të gjetur zgjidhje për qasje tek kjo procedure në kushtet kur Gjykata e Lartë e vendit, ua ka lënë në dorë shteteve, zgjidhjen mbi këtë çështje./ VOA