web counter
LEXO PA REKLAMA!

SHKARKO APP

App Store
Google Play

Talebanët i ndalojnë hyrjen në Afganistan raportuesit të OKB-së

21 Gusht 2024, 13:46, Kosova & Bota CNA
Talebanët i ndalojnë hyrjen në Afganistan raportuesit të
Raportuesi i OKB-së për Afganistan, Richard Bennett. Fotografi nga arkivi, AFP

Talebanët ia kanë ndalur hyrjen në Afganistan raportuesit special të Kombeve të Bashkuara, Richard Bennett, tha një zëdhënës i talebanëve për transmetuesin lokal, "Tolo", duke e akuzuar mbikëqyrësin e të drejtave të njeriut për “përhapje të propagandës”.

Bennett u emërua nga Këshilli për të Drejtat e Njeriut i Kombeve të Bashkuara më 2022 për të monitoruar situatën e të drejtave të njeriut në Afganistan pasi taebanët morën pushtetin në 2021.

Bennett, që më herët ka thënë se trajtimi që talebanët u bëjnë grave dhe vajzave përbën krim kundër njerëzimit, ka bazën jashtë Afganistanit, por e ka vizituar këtë shtet disa herë për të hulumtuar rreth situatës për të drejtat e njeriut.

Këshilli për të Drejtat e Njeriut i OKB-së ende nuk ka komentuar për këtë vendim të talebanëve, e as Bennett.

Zëdhënësi i Ministrisë së Jashtme të administratës talebane, Abdul Qahar Balkhi, i tha "Reuters" se Bennett “nuk ka mundur të marrë vizë udhëtimi për në Afganistan".

Ndërkaq, zëdhënësi i administratës talebane, Zabihullah Mujahid, më herët kishte deklaruar se talebanët respektojnë të drejtat e grave në bazë të interpretimit të tyre të ligjit islamik dhe traditave vendore. Ai tha për Tolo se Bennett-it nuk do t’i mundësohet hyrja në Afganistan sepse “ai është emëruar për të përhapur propagandë në Afganistan. Ai ekzagjeron problemet e vogla dhe i përdor për propagandë”.

Tri vjet pasi trupat e huaja u tërhoqën dhe talebanët morën pushtetin, asnjë qeveri e huaj nuk i ka njohur zyrtarisht talebanët si udhëheqës të Afganistanit.

Pas rikthimit në pushtet, talebanët kanë tkurrur të drejtat e grave dhe vajzave. Shumica e vajzave mbi 12 vjeç nuk lejohet të vazhdojnë mësimin, ndërkaq gratë nuk lejohen të vizitojnë parqet dhe të udhëtojnë të pashoqëruara nga një burrë./ REL





Lajmet e fundit nga