web counter
LEXO PA REKLAMA!

SHKARKO APP

App Store
Google Play

E fundit!

x

Hezbollahu hedh mbi 50 raketa drejt Lartësive të Golanit

21 Gusht 2024, 11:12, Kosova & Bota CNA
Hezbollahu hedh mbi 50 raketa drejt Lartësive të Golanit
Zjarrfikësit duke shuar zjarrin pas sulmeve të Hezbollahut në Lartësitë e aneksuara të Golanit. 21 gusht 2024. Burimi, AFP

Grupi libanez Hezbollahu – i shpallur organizatë terroriste nga Shtetet e Bashkuara – ka gjuajtur mbi 50 raketa, duke goditur një numër të shtëpive private në Lartësitë e Golanit, të aneksuara nga Izraeli.

Sulmi i 21 gushtit ndodhi një ditë pasi sekretari amerikan i Shtetit, Antony Blinken, u takua me negociatorët e tjerë nga Egjipti dhe Katari, në përpjekjen diplomatike për të arritur një armëpushim në luftën në Gazë.

Hamasi – grupi palestinez i shpallur organizatë terroriste nga SHBA-ja dhe BE-ja – dhe Izraeli ende nuk kanë tejkaluar dallimet për arritjen e një armëpushimi në Gazë.

Ekipet e emergjencave në Lartësitë e Golanit thanë se kanë trajtuar një 30-vjeçar, i cili u plagos gjatë sulmeve. Një shtëpi u përfshi nga zjarri dhe zjarrfikësit thanë se kanë parandaluar një tragjedi më të madhe, pasi ndaluan rrjedhjen e gazit.

Hezbollahu tha se sulmet ishin kundërpërgjigje ndaj një sulmi ajror izraelit në thellësi të Libanit të martën mbrëma që la të vrarë një dhe plagosi 19 të tjerë. Hezbollahu ka gjuajtur mbi 200 raketa drejt Izraelit, që kur Izraeli shënjestroi një depo armësh të Hezbollahut rreth 80 kilometra larg kufirit.

Që kur ka nisur lufta në Gazë më 7 tetor, Hezbollahu dhe Izraeli kanë këmbyer zjarr, kryesisht në kufi. Nga shkëmbimet e zjarrit janë vrarë më shumë se 500 persona në Liban – shumica anëtarë të Hezbollahut dhe 100 civilë – dhe 23 ushtarë dhe 26 civilë në Izrael.

Izraeli mori Lartësitë e Golanit nga Siria në Luftën e Lindjes së Mesme më 1967 dhe më pas i aneksoi. SHBA-ja është i vetmi vend që e njeh aneksimin e Izraelit të këtij territori, ndërkaq pjesa tjetër e komunitetit ndërkombëtar e konsideron Golanin si territor të pushtuar sirian./ REL





Lajmet e fundit nga