web counter
LEXO PA REKLAMA!

SHKARKO APP

App Store
Google Play

E fundit!

x

Shkarkimi i Sekretarit Mayorkas pritet të hidhet poshtë nga shumica demokrate në Senat

14 Shkurt 2024, 19:47, Kosova & Bota CNA

Shkarkimi i Sekretarit Mayorkas pritet të hidhet poshtë nga shumica

Republikanët në Dhomën e Përfaqësuesve të SHBA-së miratuan të martën ngritjen e akuzave për shkarkimin e Sekretarit të Sigurisë Kombëtare, Alejandro Mayorkas duke e bërë atë përgjegjës për fluksin rekord të emigrantëve të paligjshëm që kalojnë kufirin SHBA-Meksikë. Republikanët e vijës së ashpër kanë vënë në shënjestër zotin Mayorkas për muaj të tërë për këtë çështje. Shkarkimi i zotit Mayorkas mund të bëhet në Senat ku demokratët kanë shumicën dhe sipas të gjitha gjasave akuzat do të hidhen poshtë.

“Pro votuan 214 ligjvënës dhe kundër votuan 213, rezoluta u miratua”, konfirmoi ngritjen e akuzave për shkarkimin e Sekretarit Mayorkas republikani Mike Johnson, kryetar i Dhomës së Përfaqësuesve.

Votimi për ngritjen e akuzave për shkarkim kaloi megjithëse tre republikanë iu bashkuan demokratëve duke votuar kundër.

Republikanët e vijës së ashpër kanë vënë në shënjestër zotin Mayorkas për muaj të tërë, por javën e kaluar ata dështuan për vetëm një votë më pak në përpjekjen e parë për të ngritur këto akuza.

Votimi të martën ishte përsëri i ngushtë, por megjithatë ai përfundoi me ngritjen e akuzave për shkarkim të Sekretarit Mayorkas me kthimin e udhëheqësit të shumicës republikane Steve Scalise në Kongres. Ai nuk mori pjesë në votimin e javës së kaluar pasi po merrte trajtim mjekësor.

Zoti Mayorkas është anëtari i dytë i kabinetit qeveritar në historinë amerikane ndaj të cilit ngrihen akuzat për shkarkim. Në vitin 1876, Dhoma e Përfaqësuesve ngriti akuza ndaj sekretarit të Mbrojtjes William Belknap në lidhje me kontratat qeveritare. Ai dha dorëheqje para votimit.

Javën e kaluar zoti Mayorkas e bëri të qartë se nuk do të jepte dorëheqje nëse ngriheshin akuzat për shkarkim kundër tij.

Pas votimit në Dhomën e Përfaqësuesve, akuzat do të dërgohen në Senat.

Demokratët kanë epërsi në Senat, ata kontrollojnë 51 vende dhe republikanët kanë 49.

Ka pak gjasa që demokratët të mbështesin largimin nga detyrat e zotit Mayorkas.

Çështja e imigracionit ka të ngjarë të jetë çështje kryesore në garën presidenciale të nëntorit, ku Preisenti Biden dhe ish Presidenti Trump duket se do të përballen përsëri me njëri-tjetrin./ VOA





Lajmet e fundit nga