web counter
LEXO PA REKLAMA!

SHKARKO APP

App Store
Google Play

E fundit!

x

SHBA, sanksione familjes Dodik/Organizuan paradën e shpallur tri herë si jokushtetuese

17 Janar 2025, 21:15, Kosova & Bota CNA
SHBA, sanksione familjes Dodik/Organizuan paradën e shpallur tri herë
Presidenti i entitetit serb të Bosnje e Hercegovinës, Republika Sërpska, Millorad Dodik

Shtetet e Bashkuara kanë vendosur të premten sanksione kundër pesë individëve dhe një kompanie, të cilët i kanë ndihmuar presidentit të entitetit serb të Bosnje e Hercegovinës, Republika Sërpska (RS), Millorad Dodik, dhe familjes së tij, të pasurohen në kurriz të popullit.

Departamenti amerikan i Thesarit njoftoi gjithashtu se ka vendosur sanksione edhe kundër tetë individëve që organizuan festimin e ditës antikushtetuese të këtij entiteti në fillim të këtij muaji.

Zyra amerikane për Kontrollin e Aseteve të Huaja (OFAC) tha në një komunikatë se ka futur në listën e zezë Pavlo Çoroviçin, që është dhëndri i Dodik, Radmila Bojaniçin, Nemanja Reljinin, Sinisha Dodikun dhe Marko Gujançiçin, për shkak se kanë ndihmuar Dodikun dhe familjen e tij të pasurohen.

Për organizimin e festimit të ditës antikushtetuese të RS-së, sipas udhëzimeve të Dodikut, u vendosën sanksione ndaj ministrit të Punëve të Brendshme të këtij entiteti, Sinisha Karan, shefit të kabinetit të Dodikut, Danijelo Dragiçeviq, shefit të Protokollit të RS-së, Goran Rakoviç, sekretarit të Përgjithshëm të RS-së Dalibor Paniç, drejtoreshës së Radios dhe Televizionit të RS-së, Dijana Milankoviç, presidentit të Gjykatës Kushtetuese RS-së, Gerard Selman, presidentit të Akademisë së Shkencave dhe Arteve të RS-së, Rajko Kuzmanoviç, dhe shefit të kabinetit të kryetarit të Kuvendit të RS-së, Goran Filipoviç.

Republika Sërpska, organizioi më 9 janar një paradë në rrugët e Banjallukës, të cilën Gjykata Kushtetuese e Bosnjës e ka shpallur tri herë jokushtetuese.

Paraprakisht, Ambasada amerikane në Sarajevë kishte bërë thirrje për hetim të çdo shkeljeje të ligjit lidhur me shënimin e ditës jokushtetuese.

OFAC tha se vendimin për sanksionet e së premtes e mori pas urdhrit ekzekutiv të 8 janarit të presidentit amerikan, Joe Biden, i cili zgjeroi fushëveprimin e autoriteteve amerikane për t’i luftuar aktivitetet që minojnë ose tentojnë të minojnë kornizat rajonale të paqes dhe sundimin e ligjit në Ballkanin Perëndimor.

"Veprimet e sotme vunë në pah përpjekjet e vazhdueshme të Dodikut për ta minuar kuadrin demokratik dhe shumetnik që definon Bosnje e Hercegovinën moderne", tha ushtruesi i detyrës së nënsekretarit të Departamentit të Thesarit për Terrorizmin dhe Inteligjencën Financiare, Bradley T. Smith.

Ai shtoi se SHBA-ja, duke përdorur fuqitë e saj të zgjeruara, mbetet e përkushtuar për të penguar çdo përpjekje të Dodikut dhe miqve të tij për t’u pasuruar dhe për ta destabilizuar rajonin./REL





Lajmet e fundit nga