Rama kërkon sanksione për Serbinë/ "BE të marrë masa pa humbur kohë"

2 Tetor 2023, 15:27, Kosova & Bota CNA

Rama kërkon sanksione për Serbinë/ "BE të marrë

Kryeministri Edi Rama

Kryeministri Edi Rama kërkoi që të vendsen sanksione ndaj Serbisë, teksa foli për sulmin e grupit të armatosur në veri të Kosovës dhe qëndrimet e ndërkombëtarëve.

Në një konferencë të përbashkët për mediat me kryeministrin e Kroacisë, Andrej Plenkoviç, Rama tha se ashtu siç u morën masa ndaj Kosovës, BE duhet të marrë masa edhe për Serbinë.

“Na duhet një qëndrim i unifikuar lidhur me atë që ndodhi, jo vetëm në fjalë, por me fakte. Evropa e bashkuar, kryeministri i Kroacisë është një ndër njohësit më të thellë të labirinteve të kështjellës së Harry Poterit evropian. Këtu bëhet fjalë për masa simetrike minimumi që duhet të merren jo vetëm ndaj Kosovës, por minimumi edhe në Serbi.

Masat të merren edhe për Serbinë. Ka programe, ka marrëdhënie për t'i thënë stop dhe në asnjë mënyrë nuk mund të pranohet që në mes të Evropës dhe një rajoni një grup kriminal i armatosur 'gjer në dhëmbë' ushtarakisht, me uniforma ilegale t’i marrë jetën një polici e t'i gëzohet nderit më të lartë zisë kombëtare. Ky është kulmi, e papranueshme”, u shpreh ai.

Rama, i zhgënjyer nga BE / Nuk mbështesim deklaratën e tyre për sulmin në Kosovë
2 Tetor, 15:14

Kreu i qeverisë deklaroi se hetimi ndërkombëtar duhet të bëhet, por gjithashtu duhet të vendosen edhe sanksione pa humbur kohë.

“Hetimi ndërkombëtar, është shumë mirë të bëhet që në fund fare mund të japë edhe një element më shumë, por ndërkohë pa pasur nevojë për ndonjë hetim ndërkombëtar ne kemi faktin, kemi krimin, vrasjen e një efektivi të policisë dhe kemi heroizimin e atyre që morën pjesë në vrasje. Hetimi ndërkombëtar në aspektin politik dhe të qëndrimit të një shteti në raport me disa norma dhe me disa vlera të patjetërsueshme, kjo është qartësisht e mjaftueshme që minimalisht ato masa që Komisioni t’i marrë pa hetimin ndërkombëtar. Duhet të merren masa pa humbur kohë. Kërkoj një qëndrim vijueshëm të drejtë dhe padiskutueshëm të shpejtë të vetë BE-së. Është edhe ura e një dialogu që duhet të shkojë përpara. Nuk ka nevojë për hetim ndërkombëtar, për të hedhur këto hapa, më pas le të vijë nëse merr përsipër dikush”, theksoi Rama./ CNA