E fundit!

12:34 Aktualitet

Kërkesa e protestuesve për kufizimin e mandatit të kryeministrit/ Berisha: PD e gatshme ta votojë

Kreu i PD-së, Sali Berisha, deklaroi se Partia Demokratike...

Putin: Rusia është e bashkuar si kurrë më parë

4 Korrik 2023, 22:09, Kosova & Bota CNA

NJU DELHI (AP) - Presidenti Vladimir Putin tha të martën se populli rus është "i bashkuar si kurrë më parë", duke kërkuar të krijojë besim pas një revolte jetëshkurtër, ndërsa merrte pjesë në takimin e një organizate ndërkombëtare që i ofroi atij një audiencë dashamirëse.

Takimi i Organizatës së Bashkëpunimit të Shangait, organizuar nëpërmjet një videokonference nga India, ishte takimi i parë shumëpalësh i nivelit të lartë për Presidentin Putin që nga një rebelim i armatosur që tronditi Rusinë dhe vjen pasi ai është i etur të tregojë se Perëndimi ka dështuar ta izolojë Moskën për agresionin ndaj Ukrainës që ndërmori në vitin 2022.

Grupi aziatik i sigurisë, i themeluar nga Rusia dhe Kina për të kundërshtuar aleancat perëndimore, mirëpriti gjithashtu Iranin si një anëtar të ri, duke e çuar anëtarësimin në nëntë vende.

Duke folur përmes videos nga Kremlini, zoti Putin vlerësoi organizatën për "luajtjen e një roli gjithnjë e më të rëndësishëm në çështjet ndërkombëtare, duke dhënë një kontribut të vërtetë në ruajtjen e paqes dhe stabilitetit, siguruar rritje të qëndrueshme ekonomike të shteteve pjesëmarrëse dhe forcimin e lidhjeve midis popujve".

Ai falënderoi vendet anëtare për mbështetjen e autoriteteve ruse gjatë rebelimit jetëshkurtër të organizuar nga shefi i Wagner-it, Yevgeny Prigozhin, dhe tha se Perëndimi e kishte kthyer Ukrainën në “një shtet praktikisht armiqësor – anti-rus”. Zoti Putin e ka sulmuar shpesh Perëndimin për mbështetjen që i ka dhënë Ukrainës në luftë.

Takimi i nivelit të lartë i dha presidentit Putin një mundësi për të treguar se ai mbetet në kontroll pasi përpjekja ushtarake la disa pikëpyetje rreth ndarjeve midis elitave ruse.

"Populli rus është i bashkuar si kurrë më parë," tha ai. "Solidariteti dhe përgjegjësia për fatin e atdheut u demonstrua qartë nga qarqet politike ruse dhe e gjithë shoqëria duke qëndruar si një front i bashkuar kundër tentativës për rebelim të armatosur".

Folësit e mëparshëm shmangën referimet e drejtpërdrejta për luftën, ndërsa ngritën shqetësime për pasojat e saj globale.

Një deklaratë e miratuar në takimin e nivelit të lartë virtual gjithashtu nuk i referohej Ukrainës, por aty thuhej se kërcënimet dhe sfidat "po bëhen gjithnjë e më komplekse, shkatërruese dhe të rrezikshme, dhe se konfliktet ekzistuese po përkeqësohen dhe po shfaqen konfliktet e reja"./ VOA