web counter
LEXO PA REKLAMA!

SHKARKO APP

App Store
Google Play

Prokuroria ngre aktakuzë ndaj dy personave për kanosje ndaj Kurtit

1 Gusht 2025, 14:45, Kosova & Bota CNA

Prokuroria ngre aktakuzë ndaj dy personave për kanosje ndaj Kurtit

Prokuroria Speciale e Kosovës ka dorëzuar në Gjykatën Themelore në Prishtinë një aktakuzë ndaj dy personave, të cilët dyshohen se kanë kanosur kryeministrin në detyrë të Kosovës, Albin Kurti.

Prokuroria ka identifikuar të dyshuarit me iniciale, F.K. dhe N.S.

Sipas saj, ata dyshohet se në 2023 kishin publikuar në llogaritë e tyre në "Facebook" shkrime me përmbajtje kërcënuese ndaj Kurtit.

Faton Klinaku nga Organizata e Veteranëve të Ushtrisë Çlirimtare të Kosovës, ka shkruar në "Facebook" se as ai dhe as avokati i tij nuk janë informuar se ndaj tij është ngritur një aktakuzë, por shtoi se “mezi pret” që të ballafaqohet me Kurtin në gjykatë.

Prokuroria Speciale e Kosovës tha se më 30 gusht të vitit 2023, F.K., e kishte përsëritur një postim me përmbajtje kërcënuese ndaj Kurtit ku thuhej: “... Prapë po e përsëris, nëse ju duket skandaloz postimi i mëhershëm: Më parë e vras A.K. sesa t’ia lëshoj rrugën dhe të iki nga Kosova".

Ndërkaq, N.S., sipas Prokurorisë, e ka kanosur me vrasje Kurtin përmes postimeve të bëra në "Facebook", për shkak të funksionit të tij si kryeministër, duke iu referuar postimit kërcënues të F.K.

Sipas Kodit Penal të Kosovës, kushdo që synon që përmes dhunës apo kanosjes të pengojë përfaqësuesit e lartë të Kosovës të kryejnë detyrat e tyre mund të dënohet nga 3 deri në 10 vjet burgim./ Rel





Lajmet e fundit nga