LEXO PA REKLAMA!

SHKARKO APP

Për herë të parë Kosova merr vlerësim kreditor

20 Prill 2024, 15:14, Kosova & Bota CNA

Për herë të parë Kosova merr vlerësim kreditor

Ministria e Financave, Punës dhe Transfereve e Kosovës bëri të ditur se Agjencia ndërkombëtare Fitch Ratings ka dhënë vlerësim kreditor ‘BB-’ për Kosovën.

Vlerësimi kreditor mat aftësinë e Qeverisë për të shlyer borxhet e saj.

“Ky vlerësim kreditor do të shërbejë si një pasaportë për Kosovën për çdo investitor të huaj që është i interesuar që të shohë se a ia vlen të investohet në vendin tonë. Po ashtu do të ndikojë në uljen e kostos së financimit, që rrjedhimisht do të ketë mundësi më tepër për financim për bizneset tona”, tha ministri i Financave, Hekuran Murati përmes një video-deklarate të publikuar në "Facebook".

Kjo është hera e parë që është publikuar një vlerësim kreditor për Kosovën.

Sipas Ministrisë së Financave, kjo po ashtu “merr parasysh qëndrueshmërinë e politikave fiskale, borxhin publik, deficitin, rritjen ekonomike, sektorin bankar, dhe cilësinë e qeverisjes ndër tjera”.

Në vlerësimin kreditor merren parasysh shumë faktorë ekonomikë, financiarë, institucionalë e politikë, andaj ai tregon nëse shteti ka qëndrueshmëri ekonomike dhe financiare.

“Ky vlerësim kreditor e vendos Kosovën në hartën botërore të shteteve serioze me politika të qëndrueshme, duke forcuar kështu edhe më tej pozicionin e vendit dhe njohjen në arenën ndërkombëtare”, tha Ministria e Financave.

Vlerësimi Kreditor për Kosovën është mbështetur nga Agjencia e SHBA-së për Zhvillim Ndërkombëtar (USAID)./REL 

Lajmet e fundit nga