web counter
LEXO PA REKLAMA!

SHKARKO APP

App Store
Google Play

OKB-ja paralajmëron/ “Mund të përballemi me krizë globale të ujit”

22 Mars 2023, 08:32, Kosova & Bota CNA
OKB-ja paralajmëron/ “Mund të përballemi me krizë
Foto ilustruese

Një raport i Kombeve të Bashkuara ka paralajmëruar për një krizë globale të ujit për shkak të mungesës apo mbikonsumit dhe ndryshimeve klimatike.

Publikimi i raportit vjen përpara samitit të parë të madh të OKB-së për ujin që nga viti 1977. Mijëra delegatë do të marrin pjesë në mbledhjen treditore në Nju Jork që fillon të mërkurën.

Sekretari i Përgjithshëm i OKB-së, Antonio Guterres, thotë se uji, "gjaku i jetës së njerëzimit", po thahet nga "përdorimi pa kriter, ndotja dhe ngrohja e pakontrolluar globale".

Raporti, i botuar nga OKB dhe UNESCO paralajmëron se "mungesa po bëhet endemike" për shkak të mbikonsumit dhe ndotjes, ndërsa ngrohja globale do të rrisë mungesën sezonale të ujit.

Richard Connor, autori kryesor i raportit, tha se rreth 10% e popullsisë globale "aktualisht jeton në zona kritike për ujin".

Sipas raportit më të fundit të OKB-së për klimën, botuar të hënën nga paneli i ekspertëve IPCC, "afërsisht gjysma e popullsisë së botës aktualisht përjeton mungesë të rëndë uji për të paktën një pjesë të vitit".

Connor tha për gazetarët se "pasiguritë po rriten" kur bëhet fjalë për furnizimin global me ujë. "Nëse nuk e trajtojmë atë, patjetër do të ketë një krizë globale," tha ai.

Nënsekretarja i përgjithshme e OKB-së, Usha Rao Monari, e cila është mikpritësja zyrtare e Konferencës së OKB-së për Ujërat, tha për "BBC" se burimet do të duhet të menaxhohen më me kujdes në të ardhmen.

"Ka mjaft ujë në planet nëse e menaxhojmë atë në mënyrë më efektive sesa e kemi menaxhuar gjatë dekadave të fundit," tha ajo.

"Mendoj se do të duhet të gjejmë modele të reja qeverisjeje, modele të reja financimi, modele të reja të përdorimit të ujit dhe ripërdorimit të ujit se kurrë më parë. Mendoj se teknologjia dhe inovacioni do të luajnë një rol shumë të madh për të parë se si të menaxhohet sektori i ujit dhe përdorimin e ujit”./ CNA.al





Lajmet e fundit nga