Më shumë se 500 refugjatë shpëtohen në Mesdhe

12 Dhjetor 2022, 08:21, Kosova & Bota CNA

Anija gjermane "Humanity 1" u ankorua në portin italian të Barit me 261 persona të shpëtuar në bord. Autoritetet italiane kanë kërkuar të premten në mbrëmje që anija e organizatës SOS Humanity, e cila ndodhej rreth 300 milje detare nga Bari, të shkojë në këtë port. Udhëtimi atje në mot jashtëzakonisht të keq dhe dallgë të larta zgjati 40 orë, sqaroi SOS Humanity. Shumë njerëz në bord u lagën dhe u sëmurën në det.

Sipas ekuipazhit, në bordin e "Humanity 1" ndodheshin edhe 93 të mitur, shumica prej tyre të pashoqëruar nga të afërm të rritur. Shumë njerëz treguan shenja torture. Disa thanë se ishin abuzuar seksualisht. Organizata përmendi vende si Siria, Egjipti, Kameruni dhe Bregu i Fildishtë si vende të origjinës.

Këtë herë duhet të shkojnë gjërat më shpejt

Refugjatët e shpëtuar në Salermo

Gjithashtu të premten, autoritetet italiane i caktuan "Geo Barents” portin e Salernos, në jug të Napolit si vend ku duhet të shkojë. Anija e shpëtimit me flamur norvegjez e organizatës së ndihmës "Mjekët pa Kufij" kishte 248 persona në bord. Gratë, fëmijët dhe burrat ishin kapur nga gomone dhe varka druri në brigjet e Libisë.

"Geo Barents" dhe "Humanity 1" kanë shpëtuar refugjatët dhe emigrantët në disa misione që nga fundjava e kaluar. Në nëntor, anijet private të shpëtimit duhej të prisnin një kohë të gjatë për të gjetur një port për shkak të një mosmarrëveshjeje me qeverinë e re të krahut të djathtë në Romë. Dhe më pas jo të gjithë të shpëtuarit u lejuan të zbrisnin. Por këtë herë duhet të veprohet më shpejt.

Roma mbetet në qëndrime të ngurta

Rrugët e rrezikshme të refugjatëve

Megjithatë, Ministria e Brendshme në Romë thekson se qëndrimi bazë i qeverisë nuk ka ndryshuar. Ekuipazhet përdorën parashikimin e motit si një "pretekst" për të raportuar emergjencat në bord. Për shkak se portet dhe objektet për pritjen e refugjatëve në Sicili janë të mbipopulluara, anijet janë caktuar të shkojnë në qytete të tjera. Përveç kësaj, Roma vazhdimisht akuzon organizatat për inkurajimin e kalimeve të rrezikshme nëpër Mesdhe. Prandaj, ato fajësohen për emigracionin e paligjshëm.

Nuk ka më shpëtim detar të organizuar nga shteti në Mesdhe. Vetëm anijet e organizatave private të ndihmës janë ende në kërkim të refugjatëve dhe emigrantëve në nevojë./DW