E fundit!

12:43 Aktualitet

Helmimi i kursantëve të Akademisë së Sigurisë/ Reagon Sori-Al: Futen ushqime nga jashtë

Kompania Sori-Al ka reaguar në lidhje me helmimin e 60 kur...

Lirohen tre malazezët e arrestuar në Kosovë vitin e kaluar për nxitje urrejtjeje

17 Janar 2025, 21:34, Kosova & Bota CNA

Lirohen tre malazezët e arrestuar në Kosovë vitin e kaluar

Prokuroria Speciale e Kosovës ka pushuar hetimet ndaj tre malazezëve të arrestuar në fund të vitit të kaluar nën dyshimin për “nxitje të urrejtjes dhe mosdurimit”, konfirmoi të premten për Radion Evropa e Lirë zëdhënësja e Prokurorisë Speciale, Liridona Kozmaçi.

Kozmaçi tha se nga provat e siguruara nuk është vërtetuar se të pandehurit e kanë kryer veprën penale, për të cilën është zhvilluar hetimi nga Prokuroria Speciale.

Policia e Kosovës arrestoi Rajko Krivokapiç, 34 vjeç, Marinko Jovanoviq, 24 vjeç, dhe Dragutin Llallatoviç, 24 vjeç, për shkak se targat e automjetit me të cilin kishin shkuar në manastirin e Deçanit më 24 nëntor 2024, mbanin mbishkrimin "Kosova është Serbi".

Mbishkrimet që e paraqesin Kosovën si pjesë të Serbisë, autoritetet kosovare i trajtojnë si provokim dhe nxitje të urrejtjes dhe mosdurimit kombëtar.

Ata janë mbajtur në paraburgim prej nëntorit 2024 me urdhër të Gjykatës Themelore.

Pas arrestimit të tyre në nëntor, ministri i Mbrojtjes i Malit të Zi, Dragan Krapoviç, tha se dy nga tre të arrestuarit ishin pjesëtarë të Ushtrisë së Malit të Zi, dhe se ishin me raport.

Arrestimi i tyre kishte nxitur protestë dhe reagim nga Kisha Ortodokse Serbe në Mal të Zi, si dhe nga kryetari i komunës së Nikshiqit, Marko Kovaçeviç, i cili është funksionar i partisë Demokracia e Re Serbe (Nova Srpska Demokratija - NSD), pjesë e Frontit Demokratik prorus që së fundmi është shpërbërë.

Asokohe, Kisha Ortodokse Serbe në Mal të Zi tha se kishte nisur një protestë të ashpër ndaj krahinës jugore serbe për arrestimin e besimtarëve si dhe një protestë ndaj autoriteteve malazeze.

Partitë politike proserbe në Mal të Zi, si dhe Kisha Ortodokse Serbe, nuk e njohin Kosovën si shtet të pavarur, por e konsiderojnë si territor të Serbisë.

Mali i Zi e ka njohur pavarësinë e Kosovës në vitin 2008, gjatë qeverisjes së Partisë Demokratike të Socialistëve, e cila u rrëzua nga pushteti në gusht të vitit 2020./REL