web counter
LEXO PA REKLAMA!

SHKARKO APP

App Store
Google Play

E fundit!

x

Konflikti në Siri/ Autoritetet raportojnë për kontroll të situatës

20 Korrik 2025, 12:52, Kosova & Bota CNA

Konflikti në Siri/ Autoritetet raportojnë për kontroll të

Situata në provincën Suveida raportohet se është nën kontroll, pas disa ditësh dhune vdekjeprurëse mes fransioneve druze dhe beduinëve myslimanë sunitë. Kështu raportoi agjencia shtetërore e lajmeve siriane, SANA, duke cituar Ministrinë e Brendshme më 20 korrik.

Në Suveida, që është e banuar me shumicë druze, më nuk ka luftëtarë fisnorë dhe përleshjet kanë përfunduar, raportoi kjo agjenci.

Edhe Vëzhguesi sirian për të Drejtat e Njeriut raportoi për situatë të qetë.

Luftimet në Suveida, të cilat shpërthyen një javë më parë, lanë qindra të vdekur dhe shkaktuan një situatë të rëndë humanitare dhe një eksod masiv të civilëve nga kjo provincë, sipas aktivistëve.

Sekretari amerikan i Shtetit, Marco Rubio, kërkoi që “luftimet të ndalen menjëherë”, duke bërë thirrje për ndaljen e përdhunimeve dhe masakrimit të njerëzve të pafajshëm.

Sipas Vëzhguesit sirian për të Drejtat e Njeriut, me seli në Mbretërinë e Bashkuar – i cili mbështetet në një rrjet raportuesish brenda Sirisë, pothuajse 1.000 persona janë vrarë që nga 13 korriku, si rezultat i luftimeve në Suveida, ekzekutimeve dhe sulmeve ajrore izraelite.

Druzët janë një pakicë fetare e islamit shiit dhe jetojnë kryesisht në Siri, por edhe në Izrael, Liban dhe Jordani. Suveida është bastioni i tyre.

Pas shpërthimit të dhunës, trupat qeveritare siriane ndërhynë.

Izraeli tha se ka detyrim të mbrojë komunitetin e druzëve, pasi shumë prej tyre shërbejnë në ushtrinë izraelite. Më herët gjatë javës, Izraeli kreu sulme ajrore në Suveida dhe ndaj institucioneve qeveritare në Damask.

Situata mbetet e brishtë në Siri nën presidentin e ri të përkohshëm, Ahmed al-Sharaa, i cili mori pushtetin pas rrëzimit të sundimtarit Bashar al-Assad, gjashtë muaj më parë.

Edhe pse administrata e re ka premtuar rikthimin e stabilitetit, përplasjet etnike, dhuna nga milicitë dhe sulmet terroriste vazhdojnë në këtë shtet./REL





Lajmet e fundit nga