web counter
LEXO PA REKLAMA!

SHKARKO APP

App Store
Google Play

Konflikti i brendshëm rus/ Grupi Wagner paralajmëron Putin: Së shpejti do kemi President të ri

24 Qershor 2023, 11:43, Kosova & Bota CNA

Konflikti i brendshëm rus/ Grupi Wagner paralajmëron Putin: Së

Grupi mercenar rus Wagner, i udhëhequr nga Yevgeny Prigozhin, ka pretenduar se i ka pushtuar objektet ushtarake në qytetin e Rusisë, Rostov-on-Don.

Prigozhin ka bërë thirrje për rebelim kundër ushtrisë ruse, ndonëse e ka mohuar se po synon puç.

Kjo ka sjellë reagimin e ashpër të presidentit rus, Vladimir Putin, i cili ka thënë se po i bëhet “tradhëti”.

Pa e përmendur emrin e Prigozhinit, Putin është zotuar për t’i ndëshkuar ata që janë mbrapa rebelimit.

“Po u drejtohem qytetarëve të Rusisë, personelit të Forcave të Armatosura, forcave të rendit dhe shërbimeve speciale, ushtarëve dhe komandantëve që tani po luftojnë në pozicionet e tyre luftarake, duke zmbrapsur sulmet e armikut – siç bëjnë ata në një mënyrë heroike. Sot fola edhe një herë me komandantët e të gjitha drejtimeve. U drejtohem edhe atyre që u joshën në një aventurë kriminale me mashtrim ose kërcënim, duke vazhduar në një krim të rëndë – një rebelim të armatosur.

Rusia po bën betejën më të vështirë për të ardhmen e saj, e gjithë makineria e Perëndimit është kundër nesh. Rusia do të mbrohet, kjo është tradhti, goditje me thikë pas shpine dhe e kam fjalën për përpjekjen për të përçarë shoqërinë tonë. Situata në Rostov është e vështirë, ushtarët rusë janë urdhëruar të neutralizojnë rebelët. Çdo konflikt i brendshëm duhet të përfundojë gjatë operacionit në Ukrainë”, tha presidenti rus.

Një kundërpërgjigje ka ardhur nga grupi mercenar rus, i cili deklaron se Putin ka bërë “zgjedhjen e gabuar” dhe paralajmëron se Rusia do të ketë një President të ri.

“Putin bëri zgjedhjen e gabuar. Aq më keq për të. Së shpejti do të kemi një President të ri”, thuhet në mesazhin e “Wagner”.

Kujtojmë se Prigozhin e ka akuzuar ushtrinë ruse se ka nisur sulme vdekjeprurëse ndaj forcave të tij në Ukrainë, ku trupat e Wagnerit luftojnë përkrah ushtrisë ruse. Moska ka hedhur poshtë diçka të tillë./ CNA.al





Lajmet e fundit nga