web counter
LEXO PA REKLAMA!

SHKARKO APP

App Store
Google Play

Japonezët, në zi për ish-kryeministrin Shinzo Abe

9 Korrik 2022, 17:32, Kosova & Bota CNA
Japonezët, në zi për ish-kryeministrin Shinzo Abe
Nderime për ish-kryeministrin Abe

Një autokolonë me trupin e ish-kryeministrit Shinzo Abe mbërriti në kryeqytetin japonez të shtunën, ndërsa policia në qytetin perëndimor të Naras, ku ai u vra, tha se kishte pasur dështime në masat e sigurisë.

Qytetarët japonezë u mblodhën në rezidencën e tij dhe në skenën e sulmit të së premtes në Nara, ku udhëheqësi modern me jetëgjatësinë më të madhe politike i Japonisë u qëllua për vdekje teksa mbante një fjalim fushate. Tokio e quajti vrasjen një sulm ndaj vetë demokracisë.

Policia arrestoi një 41-vjeçar menjëherë pasi zoti Abe u qëllua nga afër dhe tha se i dyshuari kishte përdorur një armë të bërë vetë. Forca e policisë lokale tha të shtunën se masat e sigurisë kishin dështuar.

"Nuk mund ta mohojmë se kishte probleme me planin e sigurisë duke pasur parasysh se çfarë ndodhi," tha shefi i policisë së Naras, Tomoaki Onizuka, në një konferencë shtypi, duke shtuar se policia do të analizojë me hollësi se çfarë ndodhi.

Kryeministri Fumio Kishida u kthye urgjent në Tokio të premten pas vrasjes.

Në Nara, rreth 450 km në jugperëndim të Tokios, një numër i madh njerëzish u vunë në radhë për të vendosur lule pranë një fotografie të zotit Abe.

Varrimi i tij do të bëhet të martën.

Media japoneze njoftuan, duke cituar burime policore, se i dyshuari, Tetsuya Yamagami, i kishte thënë policisë se besonte se zoti Abe ishte i lidhur me një grup fetar që ai fajësoi për shkatërrimin financiar të nënës së tij. Policia nuk e ka identifikuar grupin.VOA





Lajmet e fundit nga