E fundit!

20:35 Politikë

Rama për projektin e Zvërnecit: Do të jetë krenari për Shqipërinë dhe për Europën

Kryeministri Edi Rama në konferencën ndërqeveritare është ...

"I vetmi vendim i drejtë është pafajësia"/ Thaçi në Hagë: ZPS përpiqet të hedhë poshtë dëshmitë e zyrtarëve të lartë

18 Shkurt 2026, 14:48, Kosova & Bota CNA

Ish-presidenti i Kosovës, Hashim Thaçi, ka mbajtur fjalën e tij në ditën e fundit të gjyqit në Hagë. Thaçi deklaroi edhe njëherë se është i pafajshëm dhe shprehu keqardhjen për të gjitha viktimat.

Në fjalën e tij, Thaçi u shpreh se ai nuk po bënte plane për të marrë kontrollin e Kosovës, por vendosi të kthehej në atdhe teksa shihte se si populli i tij po shfarosej. Ish-kryeministri i Kosovës deklaroi se i vetmi kundërshtar i tij ishte Sllobodan Millosheviçi dhe në vitin 1999 i vetmi që kishte nën kontroll Kosovën ishte regjimi i Millosheviçit.

Thaçi tha se ishte Millosheviçi ai që filloi luftën në Kosovë, ndërsa populli i Kosovës donte vetëm paqe dhe liri, që nuk do të ishin bërë të mundura pa ndërhyrjen e NATO-s.

Ish-lideri i UÇK-së u shpreh se ZPS-ja po përpiqet të hedhë poshtë dëshmitë e zyrtarëve të lartë.

Në përfundim të fjalës së tij, Thaçi i bëri thirrje gjykatës të marrë një vendim në përputhje me ligjet e Kosovës dhe ky vendim do të ishte pafajësia e plotë.

Fjala e Thaçit

Jam i pafajshëm. Shpreh keqardhje për të gjitha viktimat. Nuk po bëja plane për të marrë kontrollin e Kosovës, unë isha student. Plane po bënte Millosheviçi, për një gjenocid të ri.

Duke parë masakrat ndaj popullit tim, unë nuk mund të qëndroja indiferent. Vendosa të kthehem në Kosovë, një vendim personal i mi, i askujt tjetër. Nuk mund të qëndroja anash teksa populli im përballej me shfarosje.

Është e padrejtë dhe për përpjekjet e NATO-s, me të cilin bashkëpunova ngushtë. Më lejoni të përsëris një të vërtetë të përjetshme, i vetmi kundërshtar i imi ishte Sllovbodan Millosheviçi. Gjatë luftës nuk e dija nëse do të isha gjallë nga ora në orë, nuk isha i sigurt nëse do të shihja familjen time. Lëre më pastaj të ushtroja kontroll në Kosovën e pushtuar. Unë nuk u ktheva të rrezikoja jetën time për kontroll dhe pushtet, u ktheva në Atdhe për liri dhe paqe.

Pyetja që shtrohet sot është, marrja e kontrollit prejt kujt. E vërteta është që kontrolli ishte në duart e hekurta të Millosheviçit. Misoni ynë ishte mbijetesa, liria dhe paqja. Unë nuk kisha fare iluzione, por shpresa e vetme e jona për shpëtim ishte bota demokratike, SHBA dhe NATO. Fokusi im ishte ndërtimi dhe forcimi i kësaj aleate.

Millosheviçi kishte filluar luftën në Kosovë, ne vetëm po mbroheshim. Po të mos ishte vendimi i NATO-s nuk do të kishte as liri dhe as Pavarësi të Kosovës.

Nuk isha unë ai që transportoi rezistencën nga perëndimi në Kosovë, unë iu bashkova. Arsyeja pse UÇK po masivizohej ishte Millosheviçi. UÇK nuk ishte ushtri e një shteti, ishte organizim popullor që po mbrohej ndaj një agresori.

Nuk do të rrezikoja ekzistencën tonë kolektive. Synimi ishte paqja jo lufta.

Kur bota demokratike thirri Rambujenë ne vendosëm të përgjigjeshim pozitivisht. Pranuam marrëveshje e aqes dhe pse nuk plotësonte të gjitha kërkesat. Kosova zgjodhi paqen, Serbia luftën.

Gjatë tërë kësaj kohe, i vetmi pushtet që kisha kësaj kohe ishte pushteti i zërit tim.

Ajo që po bëja kishte pasoja fizike dhe elektorale, por Kosova ishte më e rëndësishme. E përdora zërin tim për të bërë thirrje për paqe dhe tolerancë.

Kjo prokurori përpiqet të hedhë poshtë dëshmitë e zyrtarëve të lartë. Kjo prokurori pretendon se unë i paskam nxjerrë në lajthitje gjatë gjithë kohës së luftës. Kjo prokurori lartëson dëshmitë e fabrikuara nga epoka e regjimit të Millosheviçit.

Kam vetëm një lutje, që vendimi të jetë në përputhje me ligjet e Kosovës. I vetmi vendim i drejtë është pafajësia e plotë./CNA