web counter
LEXO PA REKLAMA!

SHKARKO APP

App Store
Google Play

Grenell: Marrëveshjen e Uashingtonit e ka negociuar Thaçi, e jo Hoti

17 Gusht 2022, 10:44, Kosova & Bota CNA

Ish-i dërguari i posaçëm i Shteteve të Bashkuara të Amerikës për dialogun Kosovë-Serbi, Richard Grenell, thotë se Hashim Thaçi ishte ai që kishte negociuar me presidentin e Serbisë, Aleksandër Vuçiç, për Marrëveshjen e Uashingtonit, e jo kryeministri i atëhershëm, Avdullah Hoti.

Në një intervistë për “The Pavlovic Today” tha se nëse ish—presidenti Hashim Thaçi do të ishte ende president, njerëzit në Kosovë do të ishin në paqe dhe do të jetonin më në prosperitet.

“Do të kishin po ashtu bashkëpunim të madh ekonomik me fqinjët dhe më tepër vende pune për fëmijët e tyre nëse Thaçi do të kthehej”, ka shtuar Grenell.

Për Grenell, nën administratën e ish-presidentit amerikan, Donald Trump, marrëdhëniet ndërmjet Kosovës dhe Serbisë ishin përmirësuar shumë.

“Të dyja palët flisnin rregullisht me njëra-tjetrën dhe me Shtëpinë e Bardhë, duke bërë përparim nën Trump. Ata nënshkruan marrëveshjen e normalizimit ekonomik Serbi-Kosovë. Tani jo vetëm që të dyja palët nuk po flasin, nuk po bëjnë përparim, por në fakt janë kthyer në një gjendje krize”, ka shtuar Grenell.

Grenell më tej ka kritikuar presidentin, Joe Biden, se i njëjti nuk po angazhohet në çështjen ndërmjet Kosovës dhe Sebrisë, ashtu siç ishte angazhuar shefi i tij, Trump.

“Që kur Trump u largua nga detyra, patatja e nxehtë është kthyer në duart e Bashkimit Europian. Joe Biden nuk është i informuar për situatën në Kosovë dhe Serbi dhe Jake Sullivan nuk ka kohë të angazhohet plotësisht me këtë çështje”.

Marrëveshja e Uashingtonit ishte nënshkruar më 4 shtator të vitit 2020 në Shtëpinë e Bardhë, nga kryeministri i atëhershëm Avdullah Hoti dhe presidenti i Serbisë, Vuçiç.

Sipas kësaj marrëveshjeje, Kosova dhe Serbia duhet të zbatojnë disa marrëveshje, si atë për autostradën Prishtinë-Beograd, marrëveshjen për hekurudhat duke u përkushtuar në studimin e fizibilitetit për mundësitë e lidhjes së infrastrukturës hekurudhore mes dy vendeve dhe me një port në det të thellë në Adriatik./CNA.al

 





Lajmet e fundit nga